AbakwaSassa nesiqiniseko kwabaholayo
ISOUTH African Social Security Agency (Sassa) ithi bazozithola izibonelelo zabo zikahulumeni abantu abawu-17 million abaziholayo noma kuqhubeka isiteleka sabasebenzi abangamalungu eNational Education, Health and Allied Workers Union (Nehawu).
UNobhala Jikelele weNehawu uMnuz Zola Saphetha, uthe isiteleka siyaqhubeka futhi akekho umsebenzi wakwaSassa ozoba semsebenzini kusukela namhlanje kuze kube bathola izimfuno zabo.
USaphetha uveze ukuthi abasebenzi abazange baqeqeshelwe ukusebenzisa uhlelo olusha lokuholela abantu oluhambisana nokugingqa izithupha olubizwa ngebiometric enrolment.
Esitatimendeni uMnuz Paseka Letsatsi obhekelele ezokuxhumana kwaSassa uthe baphoxekile ukuthi iNehawu isabisa ngokuteleka ngenxa ye-biometric enrolment.
“Abasebenzi baqeqeshwa ngaphambi kokwethulwa kwalolu hlelo ukuze bakwazi ukulusebenzisa. Alulusha uhlelo lwe-biometric enrolment belwenziwa nakudala. Umehluko wukuthi bekusetsenziswa u-inki nephepha ukuze oholayo agingqe isithupha. Ngesikhathi iSassa isinenkontilekaneCash Paymaster Service (CPS) ngo-2012 u-inki nephepha kwaphela ngoba abantu bese bezigingqa kwikhompyutha izithupha okuyikona esikubiza ngebiometric enrolment,” kusho uLetsatsi.
Uthe ngisho ngoJuni wonyaka odlule ngesikhathi iSassa yethula umbiko enkantolo yomthethosisekelo yasho ukuthi esikhundleni sokugingqa izithupha ephepheni sezizogingqwa kwikhompyutha kusetshenziswa i-biometric enrolment.
Isikhulu esiphezulu esisabambile kwaSassa, uMnuz Abram Mahlangu sithe kuyishwa ukuthi iNehawu iyateleka yize sekuke kwaxoxwa nayo ngalolu hlelo.
“Besixoxisana kahle neNehawu saze savumelana ngokuthi ngeke baqondiswe ubugegwe futhi sizothuthukisa izinga lokuqeqeshwa kwabasebenzi ukuze bakwazi ukuluqonda kahle lolu hlelo lwebiometric enrolment,” kusho uMahlangu.
Uphinde waveza ukuthi babe nomhlangano neNehawu ngoSepthemba 25 lapho babefuna ukukhombisa ukuthi lusebenza kanjani uhlelo olusha lokuhola kanjalo nolwe-biometric enrolment kodwa iNehawu yaphuma kulowo mhlangano.
“Sicela iNehawu izoxoxisana nathi ukuze sikwazi ukuthola isisombululo kulolu daba lwe-biometric enrolment siqhubeke nokusiza abantu,” kusho uMahlangu.