Abasolwa ngokushaqa uR7m kasomabhizinisi baboshiwe
BAKHALELWE amasongo kaSingonyela abalisa abasolwa ngokuphanga usomabhizinisi waseBergville imali elinganiselwa kuR7 million.
Kuthiwa laba balisa abane, abaneminyaka ephakathi kuka-28 no-36 babanjwe amaphoyisa ophiko lweFlying Squad nawophiko oluhamba nezinja ngoLwesibili ntambama bephethe imali enguR 7 million okukholakala ukuthi kuyona bekukhona nemali yakwamanye amazwe.
Ngokusho kwamaphoyisa kusolakala ukuthi ngoLwesibili emini laba balisa bagasele emzini kalo somabhizinisi bazenza iziphathimandla zakwaSars. Kuthiwa babophe lo somabhizinisi nezihlobo zakhe ezintathu bantshontsha imali ebisesisefeni nezibhamu ezimbili.
Okhulumela amaphoyisa KwaZulu-Natal, uLt Col Thulani Zwane, uthe amaphoyisa alunywe indlebe ngalaba balisa ase esabalalisa imininingwane ngohlobo lwezimoto abebehamba ngazo ukuze ziqashwe kuzo zonke izintuba abebengazisebenzisa uma bebaleka.
Uthe amaphoyisa abesebenzela emgwaqweni onguthelawayeka uN3 ngaphandle kwaseMgungundlovu abone izimoto ezimbili, ezifana nalezi ebekusatshalaliswe imininingwane yazo base bezijaha.
Uqhube wathi enye yezimoto abebehamba ngazo ebinabantu abathathu imisiwe yaseshwa.
“Iseshwe kwatholakala imali enkulu, amalambu aluhlaza, amavesti asetshenziswa amaphoyisa ukuzivikela, imifaniswano yamaphoyisa, nesibhamu esiyi-9mm nokunye. Laba balisa babe sebeboshwa ngaso leso sikhathi,” kusho uZwane.
UZwane uthe imoto yesibili imiswe emgwaqweni ongenela eCamperdown kwaboshwa umlisa oyedwa.
Laba balisa kulindeleke ukuthi bavele enkantolo yemantshi eBergville maduze ngamacala okubamba inkunzi, ukutholakala nempahla okusolakala ukuthi intshontshiwe, isibhamu esingekho emthethweni nezinhlamvu.
UZwane uthe uphenyo lwamaphoyisa lusaqhubeka kanti kulindeleke ukuthi kuboshwe abanye abasolwa.