Bazophenywa ababehlomula kwiVBS
IBHANGE loMbuso iSouth African Reserve Bank (SARB) lithi bazophenywa ababenikwa imali yiVBS Mutual Bank emuva kokuthi u-Advocate Terry Motau eyinike umbiko othole ukuthi kwadliwa uR1.8 billion kuleli bhange.
Esitatimendeni iSARB ithe iPhini loMphathi wayo uMnuz Kuben Naidoo wajuba uMotau ukuthi aphenye ukuze athole ukuthi ngabe iVBS yayibolekisa imali ngaphandle kokulandela umthetho, ngabe yayihlosile yini ukudla imali yamakhasimende ayo nokuthi ngabe abaphathi bayo abasebenzi nezinye izinhlaka ezithintekayo ukwenza okuphambene nomthetho?
Kulo mbiko uMotau uthe uthathe izinyanga ezinhlanu ukuphenya amahlazo ayenzeka eVBS Mutual Bank wathola ukuthi kunabantu abadle imali ecishe ifike kuR2 billion futhi ufuna baboshwe.
UMotau uveze ukuthi iVBS yayivele ikhokhele abantu imali “ukubabonga” ngoba akucaci ukuthi imali ababeyinikwa babezoyenzani.
Nalu uhlu lwabantu uMotau akholwa wukuthi babezitamuzela imali eVBS:
Uveze ukuthi iVele okuyinkampani eyayinamasheya amaningi eVBS yathola uR936 669 111
USihlalo weVele uMnuz Tshifhiwa Matodzi, wathola uR325 896 831
IFree State Development Corporation, yakhokhelwa uR104 130 932
Usomabhizinisi waseLimpopo ohlale ebonakala nosopolitiki uMnuz Kabelo Matsepe, wahlomula ngoR35 400 105
UMnuz Sipho Malaba owayeyisikhulu senkampani ecwaninga amabhuku iKPMG wahlomula uR33 978 379
UNkk Phophi Mukhodobwane wathola R30 572 296
UMnuz Paul Makhavu ongumeluleki wezomthetho weSilo samaVenda uToni Mphephu wathola uR30 461 788
UMnuz Robert Madzonga wathola uR30 372 282
UMnuz Andile Ramavhunga wathola uR28 925 934
UMnuz Solly Maposa wathola uR24 441 877
UMnuz Ralliom Razwinane wathola uR24 224 198
IFirmanox yahlomula ngoR17 748 384
Isilo samaVenda uToni Mphephu wathola uR17 729 758
UMnuz Ndivhuwo Khangale wahlomula uR16 830 091
UMnuz Sechaba Serote wathola uR16 653 458
UMnuz Ernest Nesane wathola uR16 646 086
UMnuz Brian Shivambu wathola uR16 148 569 IFoxburgh yathola uR15 104 100 UMnuz Paul Magula wathola uR14 818 098
UMnuz Charl Cilliers wathola uR12 683 947
ITiisang Private Capital yathola uR12 489 230
UMnuz Maanda Manyatshe wathola uR11 279 242
UNksz Sasa Nemabubuni wathola uR9 169 288 ISabicorp yathola uR8 453 585 UMnuz Avashoni Ramikosi wathola uR5 972 288
UMnuz Takalani Mmbi wathola uR4 404 178
UMnuz Phillip Tshililo wathola uR2 039 990.
I-SARB ithe idlulisele wonke umbiko ezinhlakeni zomthetho futhi ngeke ikwazi ukudedela izinkulumo eziqoshiwe nabantu ababuzwe ngenkohlakalo yaseVBS ngoba lokhu kuzophazamisa uphenyo lwamaphoyisa.
Ithe umbiko awusho ukuthi abantu banamacala kodwa uzonikeza izinhlaka zomthetho ithuba lokuthi ziphenye ukuze uma kukhona okufanele abekwe icala kwenziwe njalo.
UKhomishana weSouth African Revenue Service (SARS) osabambile uMnuz Mark Kingon unikeziwe ikhophi yombiko ukuze naye athathe izinyathelo ezifanele.
UMnuz Kevin Mileham okhulumela iDA kwezezimali uthe lo mbiko yisivivinyo sokuqala sikaNgqongqoshe omusha weziMali uMnuz Tito Mboweni okufanele athathe izinyathelo ngawo futhi aqinisekise ukuthi bayaboshwa abathinteka kuwo.