Kubhekwe ozothatha esokuhola i-ANC Youth League
I-ANCYL ithungatha umholi omusha ozoyivuselela njengoba ingqungquthela yokukhetha ubuholi bukazwelonke isisemome.
Ingqungquthela yophiko lwentsha kaKhongolose, izoba seNasrec eGoli ngesonto elizayo kusuka ngo-Okthoba 18, kuya kumhlaka 21.
I-ANCYL yamanje ihlale igxekwa kuthiwa ayisenashatini uma iqhathaniswa nendala ngesikhathi sikamufi uMnuz Peter Mokaba nebiholwa uMnuz Julius Malema.
Ngesikhathi uqala umkhankaso, bathathu abaholi balolu phiko abebephakanyiselwa esikhundleni sikaMengameli okungoMnuz Reggie Nkabinde waseMzumbe, Mnuz Thanduxolo Sabelo waseMbumbulu noMnuz Ndumiso Mokako waseMpumalanga.
Kuthe ngokuhamba kwesikhathi uMokako wabe esephakanyiswa esikhundleni sikaNobhala-jikelele ohlangothini lukaSabelo.
Muva nje, sekuvela negama likaMnuz Mcebo Dlamini oke waba nguMengameli womkhandlu wabafundi eWits.
Miningi imibono evelile ezinkundleni zokuxhumana ngemuva kokuvela kwegama likaDlamini, abanye bathi babona ukuthi nguyena ongakwazi ukutakula i-ANCYL okuthiwa ayisenadosi.
USabelo onguNobhala we-ANCYL KwaZulu-Natal naye uke wabhala ekhasini lakhe leFacebook lapho ethe khona uDlamini ngomunye wabantu abangasiza kakhulu emkhankasweni wokuvuselela i-ANCYL.
Umhlaziyi wezepolitiki ozimele KwaZuluNatal uMnuz Thabani Khumalo uthe ubona uDlamini engcono kakhulu uma eqhathaniswa noSabelo noNkabinde.
“UNkabinde noSabelo amagama abo abevele ekhona kusuka umkhankaso uqala kodwa umkhankaso wabo awuvuthwa kunalokho uyalotha,” kusho uKhumalo.
Uthe into eshaya uNkabinde noSabelo ukuthi kunefu phezu kwamakhanda abo.
“Alilihle igama likaNkabinde njengoba enukeka kwinkohlakalo kade ekwiMabala Noise, enye into emshayayo ukuzwana kwakhe nobenguNgqongqoshe wezaManzi uNksz Nomvula Monkonyane kanti noSabelo unezinkinga zakhe njengoba igama lakhe livela etulweni lokuketula uMengameli uMnuz Cyril Ramaphosa,” kusho uKhumalo.
Uthe igama likaDlamini lihle, usizwe kakhulu nawukuhola umkhankaso we-Fees Must Fall.
UDlamini kuthiwa ungowokuzalwa eSwatini kodwa uyilungu le-ANCYL. Umthethosisekelo we-ANCYL u-Article G, sub section 1, uthi ukuze ube yilungu le-ANCYL kumele ube ngowalapha eNingizimu Afrika futhi ube neminyaka esuka ku-18, kuya ku-35.
Ecacisa ngodaba lwakhe uDlamini ubhale ekhasini lakhe leFacebook wavuma ukuthi wazalelwa eSwatini ngunina waseVryheid, KwaZulu-Natal owayeyisishoshovu sePAC owafika kwelakwaNgwane eyobhaca.