Luyimpoqo uguquko ezinkampanini zakuleli
LUZOKWENZEKA ngenkani uguquko ezinkampanini zaseNingizimu Afrika njengoba uMnyango wezabaSebenzi ubuthula izinguquko ezihlongozwa yi-Employment Equity (EE) Amendment Bill.
IPhini loMqondisi woMnyango wezabaSebenzi ophikweni lwe-Employment Equity, uMnuz Masilo Lefika lithe kufanele kube noguquko ezinkampanini ukuze zonke izinhlanga nobulili bumeleleke.
ULefika ubekhuluma nabaqashi nezinyunyana e-Olive Convention Centre, eThekwini izolo.
Ubalule ukuthi akufanele izinkampani zibe negebe elikhulu phakathi kwemiholo yabasebenzi nezikhulu.
“Umnyango wabaSebenzi unezithangami zokucobelelana ngolwazi ezindaweni ezihlukene ukwazisa abaqashi nezinyunyana ngezinguquko kwi-Employment Equity. Indikimba yalezi zithangami zokucobelelana ngolwazi ithi Real Transformation Makes Business Sense. Izinguquko zizogxila kakhulu kuSection 53 ngoba kuyaphoqa ukuthi bonke abaqashi balandele i-Employment Equity,” kusho uLefika.
Uthe abaqashi kufanele bafunde usomqulu wokuphatha izinkampani iKings Report of Corporate Governance bese belandela nemithetho ye-Employment Equity ngoba manje uMnyango wabaSebenzi uzosebenzisana noMnyango wezoHwebo neziMboni, noMnyango weziMali.
Indlela okuzoshuba ngayo uma umqashi ethumela umbiko wokuthi uyayilandela imithetho ye-Employment Equity, uMnyango wabaSebenzi uzobheka kwiCCMA ukuthi ngabe uqinisile yini bese le mininingwane ifakwa naseMnyangweni wezoHwebo neziMboni noweziMali.
Uveze ukuthi ngeke abaqashi babe nethuba lokufihla imininingwane ethile uma befuna amathenda ngoba uMnyango weziMali uzosebenzisana noMnyango wabaSebenzi.
Izithangami zokucobelelana ngolwazi ziqale kule nyanga kanti ziya eGauteng ngoOkthoba 26.