Bacobelelana ngezokongiwa kwemvelo
KUNGASETSHENZISWA izinto ezibulala imvelo ukufundisa abafundi basezikoleni zamabanga aphansi ngokulima.
Lokhu kushiwo uMnuz Ramakgale Mampholo oyiPhini likaMqondisi ophikweni lokusetshenziswa komhlaba nenhlabathi ngaphansi koMnyango wezoLimo, ezamaHlathi nokuDoba kuleli.
UMampholo ubekhuluma engqungqutheleni yesibili ecubungula izindlela ezingasetshenziswa ukuze i-Afrika iqhubeke nokukhiqiza ukudla njengoba kunesimo sokushintsha kwesimo sezulu, i-2nd Africa Congress on Conservation Agriculture, eqale ngoLwesibili ezophela kusasa.
Ingqikithi yale ngqungquthela ithi Making Climate-Smart Agriculture Real in Africa, okusho ukuthi senza isimo sezulu esise-Afrika sisisebenzele.
UMampholo uthe izindlela ezisetshenziswayo njengamanje ziyayibulala imvelo kodwa akulula ukushintsha abalimi abazisebenzisayo lezi zindlela ngoba bakholwa ukuthi ziyabasiza ekutheni bakwazi ukukhiqiza ukudla okuningi kodwa uma kungagxilwa ekufundiseni izingane zisencane kungaba nomehluko omkhulu.
“Izindlela ezisetshenziswa abalimi njengamanje baqala ukuzisebenzisa besebancane bakhula bazi ukuthi yizona ezilungile.
“Okunye okwenza ukuthi babambelele kulezi zindlela ukuthi ziyabasiza ekutheni bakhiqize kakhulu.
“Okusempeleni nayo indlela yokukhiqiza ube wonga imvelo uyakwazi ukuyisebenzisa noma ungumlimi otshalela ukudayisa.
“Okudingekayo umsoco okhulisa izitshalo, lowo msoco uyakwazi ukuwakha ngaphandle kokusebenzisa amakhemikhali alimaza imvelo,” kusho yena.
Kulindeleke ukuthi izithunywa zale ngqungquthela zabelane ngamasu asetshenziswa emazweni ehlukene ase-Afrika, bese ziqhamuka neziphakamiso zezindlela ezingasetshenziswa e-Afrika yonke.