USemenya uyisibonelo esihle kwabesifazane
KUYINTO ejabulisayo ukuthi ekugcineni umgijimi waseNingizimu Afrika uCaster Semenya usehleka yedwa ngempumelelo ayizuze ngekhono analo kwezokusubatha.
USemenya uqale waba nenkinga ngenxa yalabo abebefuna ukumdicilela phansi beshaya amakhala ngobulili bakhe. Nokho uwuhlabe inhlali, waqhubeka nokukhombisa umhlaba ukuthi uhamba phambili futhi ngeke acekelwe phansi abezindaba abangamfuni.
Ngeledlule uSemenya uphinde wakhombisa labo abamngabazayo ukuthi uyinkunzi esiluvava okumele ibalwe nezinye izinkunzi zomhlaba kwezemidlalo. Uqokwe waba yinxusa lakwaDiscovery emhlabeni jikelele.
Lokhu kwenzeke uSemenya vele ebe nesizini enhle kwezokusubatha ekhonya kwi-800m waphinde wakhombisa ukuthi uyakwazi nokuqijima i-400m ne-1500m. I-800m useyiwine ka-29 kulandelana nokukhombisa kona ukuthi nguyena umakhonya kuleli banga.
Yonke impumelelo kaSemenya yenze abakwaDiscovery bahluleka ukuzibamba bamcela ukuba abe yinxusa labo, hhayi eNingizimu Afrika noma e-Afrika nje kuphela kodwa emhlabeni wonke. Okwenzeka kuSemenya kuyinto enhle kakhulu uma kubhekwa ubunzima asedlule kubo.
Nokho konke lokhu uSemenya ubekuthatha ngobuqhawe nesibindi esikhulu futhi akukaze kumphazamise ekwenzeni into ayithandayo, ukugijima. Akadlile ngokukhuluma kakhulu kodwa uphike ngokuthi uzobakhombisa enkundleni abazama ukuvimba impumelelo yakhe.
Ngesikhathi ekhuluma ngemuva kokuqokwa ukuba yinxusa lakwaDiscovery, uthe angakuthokozela ukugaxa amateki akhe okugijima emgibeni eseneminyaka ewu-40. Njengamanje uSemenya uneminyaka ewu-27 nokuchaza ukuthi iNingizimu Afrika isazodla izindondo eziningi ngaye emiqhudelwaneni emikhulu yomhlaba.
Okumnandi ngeSemenya wukuthi akasiyena umgijimi ojwayele ukuhlushwa wukulimala ngakho makhulu amathuba okuthi akufeze konke akufisayo kule minyaka azibekele yona engomsubathi.
Siyamhlalalisela uSemenya ngokuba yisibonelo esihle kwabanye abesifazane okukhona lapho becindezeleke khona ukuze bafeze amaphupho abo eminxeni ehlukene yempilo.