UKaunda ugqugquzele ezokuphepha
UNGQONGQOSHE wezokuThutha KwaZuluNatal uMnuz Mxolisi Kaunda uthi bazoziqapha ngelokhozi ezokuthuthwa komphakathi njengoba beqinisa ezokuphepha emgwaqweni.
UKaunda uphawule kanje ngemuva kokubamba iqhaza kwisivimbamgwaqo kuN11, eNewcastle ngoLwesibili.
Lesi sivimbamgwaqo besigxile kakhulu ematekisini nakwezinye izinhlobo zezimoto.
Zingaphezu kuka-200 izimoto ikakhulukazi amatekisi ezivinjiwe esikhathini esingaphansi kwamahora amathathu, okuholele ekutheni ezinye izimoto zikhishwe emgwaqweni ezinye zikhokhiswe inhlawulo enzima.
UKaunda uthe kumele zonke izinsuku kubhekwe ukuthi abantu bayawuhlonipha yini umthetho ikakhulukazi njengoba kuyinyanga yezokuthutha.
“Sigxile kakhulu ematekisini ngoba abantu abaningi bathembele kuwona ukuze bakwazi ukufika lapho besuke befuna ukuya khona.
“Lo mkhankaso sizowenza isifundazwe sonke ukwenza isiqiniseko sokuthi abagibeli baphephile,” kusho uKaunda.
Uthe ukuphepha kwabagibeli kuseqhulwini kubona.
“UMnyango wezokuThutha ngokubambisana nenhlangano yosomatekisi iSouth African National Taxi Council (Santaco) baqhuba umkhankaso kaHlomokela ngenhloso yokugqugquzela ukuphepha nokushayela kahle,” kusho uKaunda.
Uthe bajabule ngokwehla kwezingozi zamabhasi ezike zadla lubi emasontweni ambalwa edlule.
“Esikhathini esedlule sibone zehla izingozi ezibandakanya amatekisi, impumelelo enkulu leyo, njengohulumeni sizoqhubeka nokusebenza neSantaco ukwenza isiqiniseko sokuthi imithetho yomgwaqo iyahlonishwa,” kusho uKaunda.
Uphinde wakugcizelela ukuthi bazoqhubeka nokwenza izinhlelo zokuphucula imboni yezokuthuthwa komphakathi baqinisekise ukuthi umphakathi uhlala uphephile emigwaqweni.
Umemezele ukuthi ngoLwesihlanu bazovula ihhovisi elizokwenza umsebenzi webhodi yokukhishwa kwezimvume zokusebenza zezimoto eMbazwane ngaphansi kohlelo lokusondeza izinsiza kubantu.