Kuzothandazelwa ukuthula ezikoleni ezilwayo
KUZOKHULEKELWA ukuthi kungabheduki izimpi zezigodi ezigcina ziholele ekutheni kuphazamiseke ukubhala kukaGrade 12 ezikoleni ezingaphansi kwesizwe saKwaMzimela, eMpangeni, namhlanje.
Inkosi yaseMazimeleni, uMnuz Thanda Mzimela kaMpiyezintombi, ithe nyakenye kwaphazamiseka ukubhala kulwa abafundi baseNjingili High, basezigodini ezehlukene.
UMzimela uthe kwadingeka ukuthi aze angenelele abize abazali ukuze kuqhubeke ukubhala, kulo nyaka ufuna ukuthi kungaze kwenzeke isigameko ngaphambi kokuthi asikhuze.
UMzimela uzobe ehlangene nabafundi bakaGrade12 bezikole eziyisishiyagalombili ezikulesi sizwe.
“Uma izigodi abaphuma kuzo abafundi zinokungezwani bona akumele bathathe lezo zimpi bazilethe esikoleni ngoba kuzophazamisa ikusasa labo. Ngaphandle kwezinkinga zezimpi zezigodi kuyenzeka ukuthi abafundi babe nezinkinga zabo abasuka nazo emakhaya bagcine sebengaqedi ukubhala.
“Siyisizwe sidinga ukuthi bonke abafundi babhale izivivinyo zabo ukuze baqhubekele phambili,” kusho uMzimela.
Ngaphandle kwezinkulumo ezakhayo uMzimela uthe kuzobuye kukhishwe nezindondo ezizonikezwa izikole ezintathu ezibe nemiphumela emihle nyakenye .
“Ngokujwayelekile izindondo ezibonga abafundi ngokwenza kahle ziye zenziwe ngasekuqaleni konyaka kodwa ngikhethe ukuzenza manje, ukuze kuhlale ezingqondweni zabafundi ukuthi kumele bazimisele ukuze bakhuphule izikole abafunda kuzo,” kusho uMzimela.
Izikole ezizothola izindodo uthe iZimele High ethole u-100% isuka ku-19% eyayiwuthole ngo-2016 , iNqabayamazimela ethole u-84% neZakheleni ethole u-91%.