Ithuba kwabafuna ukulingisa
ABALINGISI abasafufusa bazothola ithuba lokubonakalisa ngethalente labo ngethemba lokuzitholela indawo emdlalweni weshashalazi ozokhonjiswa ePlayhouse Company, eThekwini, ngonyaka ozayo.
Lo mdlalo, iSizwe’s Triumph Over Sumdanger ubhalwe futhi waqondiswa wumlingisi uThabo Mnguni. Uzoba yingxenye yeSchools Season ePlayhouse kusukela ngoFebhuwari 4 kuze kube wuMashi 1.
Njengamanje kulungiselelwa ukwenziwa kwenhlolokhono yokuthungatha abalingisi abazoba yingxenye yalo mdlalo.
Abafuna ukuzama inhlanhla kumele bathumele amaCV abo nge-email ePlayhouse (testdrive@ playhousecompany.com) ngaphambi kuka-19 Okthoba ukuzibekisela indawo.
Inhlolokhono izosingathwa ngo-Okthoba 30, abazobe bebiziwe kumele baphathe izithombe zabo.
Umdlalo ukhuluma ngabafundi nothisha. Uzobe ubheke kakhulu ukuhlukumezana kwabafundi bebodwa esikoleni futhi uthinte nobungozi bokusebenzisa izidakamizwa, ukukhulelwa kwabafundi nokunye.
Abalingisi abadingekayo ngozodlala indawo kaSizwe ongumfundi oneminyaka engu-16 obuthakathaka futhi okunguye ohlukunyezwa esikoleni. Kufuneka ozoba wuSumdanger oneminyaka engu-17 oyibhoklolo, uZandile oyintombazane enhle ethanda ukukhuluma, uNonhlahla oneminyaka engu-15 onesibindi futhi ohlakaniphile nothisha oneminyaka engu-35 owuthandayo umsebenzi wakhe futhi obakhathalele abafundi bakhe.
Abazozama inhlanhla kumele balungiselele ukulingisa imuzuzu emithathu kuhambiselana nomlingiswa abafuna ukumdlala.