Kugqugquzelwa intsha ikhulume ngezifo zomqondo
INHLANGANO eqwashisa ngezifo eziphazamisa umqondo iSouth African Depression and Anxiety Group (Sadag) inxusa ukuthi kugqugquzelwe abantu abasha ukuthi bakhulume ngezifo ezithikameza umqondo.
Izolo, umhlaba wonkana ubugubha usuku lokuqwashisa ngezifo ezithikameza umqondo, iWorld Mental Health Day – indikimba yakulo nyaka ithi “Youth and Mental Health”.
Le nhlangano ithe ithola izingcingo eziningi ezithinta abantu abasha nezifo ezithikameza umqondo lapho okusuke kushaywa zingcingo abazali, othisha, abezikhungo zemfundo ephakeme, amasonto, amalungu omphakathi nabanye abantu abasha bedinga usizo.
Ngokwezibalo zakuleli ezivezwe yiSadag kuthiwa bangu-31.5% abantu abasha abazama ukuzibulala baze badinge usizo lwezempilo ngenxa yalokhu. Baphinde baveze ukuthi umfundi oyedwa kwabane kubafundi basenyuvesi useke watholakala enokhwantalala. Inhlangano yezempilo emhlabeni wonke iWorld Health Organisation (WHO) ithi iningi labantu baqala beneminyaka engu14 ukuba nezifo ezithikameza umqondo kodwa iningi labo bathola sebebadala. Ungoti wezokulashwa kwezifo ezithikameza umqondo ophinde abe yilungu lebhodi leSadag, uMnuz Zamo Mbele, uthe iningi labantu abasha abafunda ezikhungweni zemfundo ephakeme bahlaselwa wukhwantalala, nengcindezi nsukuzonke bebe bengazi ukuthi banezifo ezithikameza umqondo. “Ngebhadi lokhu sekuholele ezigamekweni eziningi zabantu abazibulalayo – njengomphakathi onakekelayo ngeke sikwazi ukwamukela lokhu. Usuku lokuqwashisa ngezifo ezithikameza umqondo lubalulekile ekutheni zigqanyiswe lezi zifo nokuthi kugqugquzelwe ukuthi kunakekelwe isimo somqondo sabafundi okungabantu asebesengozini enkulu,” kusho uMbele.
Kule nyanga iSadag inomkhankaso osezinkundleni zokuxhumana obizwa ngeWhat if Campaign wokugqugquzela ukungacwaswa kwabantu abanezifo ezithikameza umqondo nokugqugquzela abantu abasha ukuthi baxoxe ngezifo ezithikameza umqondo
Abafisa ukuba yingxenye yale mikhankaso bangavakashela ikhasi leSadag lakufacebook nakutwitter ku: @TheSADAG
Ukuthola kabanzi ngezifo ezithikameza umqondo nokuthola usizo olufanele ungavakashela kuwww. sadag.org noma bafonele ku: 0800 567 567 uma befisa ukululekwa ngokuzibulala.