Uvula amathuba kwabafundele ukulula imisipha
UKUNCIPHA kwamathuba okuqashwa kodokotela abalapha imisipha kwenze asheshe azivulele ibhizinisi lakhe, uMnuz Thulani Doncabe (29) oyi-physiotherapist.
UDoncabe ozalelwe KwaMashu, uqale ngoFebhuwari nonyaka ukuzimela emuva kokusebenza ezindaweni ezimbalwa zokwelapha. UDoncabe okhuliswe uninakhulu, uthe kwamthatha isikhathi ukubhalisela izifundo zePhysiotherapy ngenxa yokweswela imali.
Emuva kokuphothula u-matric eNtshisekelo High eNanda, waphoqeleka ukwenza iBachelor of Science (Bsc) engaqondile e-University of KwaZulu-Natal (UKZN).
“Ngathola ukuthi kuyashesha ukuvalwa ukubhalisela iPhysiotherapy nami ngafika sekuvaliwe ngikade ngisaqongelela imali yokufaka isicelo. Ngagcina ngenza iBsc ngaleso sikhathi okwakungakagcwali ukuyibhalisela. Ngayenza iminyaka emibili ngashiya phakathi, ngalandela iphupho lami lokwenza iPhysiotherapy,” echaza.
Esephothule izifundo zakhe uqeqeshwe ngaphansi kohlelo lukahulumeni olubizwa ngeCommunity Service, lapho abasebenzi bezempilo kumele basebenze emiphakathini. Usebenze emtholampilo ePoly KwaMashu wabuye wasebenza nomunye udokotela eNewcastle. Okwenze asheshe azimele uDoncabe wukuthi ubesezame kaningi efaka isicelo ezibhedlela zikahulumeni kodwa engaqashwa.
“Kumanje sinenselelo yokuthi amaPhysiotherapist kuthiwa asemaningi kakhulu, ngisho ezibhedlela ezizimele. Uma ufuna ukungena esibhedlela usizwa wukushintshana nodokotela othize enisebenzisana naye. Yilokhu okwenze ngashesha ngazisebenza ukuze nami ngisize abaphuma emanyuvesi abafuna umsebenzi. Okwethu kulula ngoba uma usuthole indawo nje uyakwazi ukuqala ukusebenza,” echaza.
UDoncabe usenezindawo ezintathu asebenzela kuzo okubalwa ePhoenix Industiral Park, ngaseDurban University of Technology eSteve Biko naKwaDukuza.
Uthe kukhona nodokotela waseMzinyathi, eNanda, asebenzisana naye, abone iziguli ntambama. Uveze nokuthi abanye ubelaphela emakhaya uma bengakwazi ukuhamba, ikakhulukazi izaguga nabakhubazekile.
Iziguli zakhe yilezo eziphathwa ngamathambo, umgogodla, imisipha namajoyinti. Uthe abanesifo sohlangothi nabo bayadinga ukwelulwa yi-physiotherapist ngoba amaphilisi ewodwa awasizi. Uphinde asize abalimele. Uthe inselelo ekhona wukuthi abantu abakakholelwa kahle ekwelashweni ngabamnyama. Kudingeka ukuthi uma usuthole ikhasimende uliphathe kahle ukuze litshele nabanye, libuyelwe nayithemba.
Ukhuthaze abasafuna ukulandela lo mkhakha ukuthi bangacabangi kuphela ukuthi bazoqashwa kodwa basheshe bazimele.