Inxanxathela esho lukhulu kwabahlala KwaDukuza
IDALE amathuba omsebenzi awu-360 inxanxathela yezitolo yaKwaDukuza evulwe ekuqaleni kwenyanga.
IKwaDukuza Mall ivulwe kubanjwe umoya kwazise kunosomabhizinisi nezakhamuzi ebezikhathazekile ebezifake izicelo zokuthi kume ukuvulwa kwayo enkantolo.
UMnuz Vivian Reddy, owakhe iKwaDukuza Mall ngaphansi kwenkampani yakhe iDouble Ring Trading ephethwe yi-Edison Property Group, uthe kuyintokozo kuye ukuvula inxanxathela yezitolo KwaDukuza ngoba lokhu kusho ukuthi abantu bazoyothenga endaweni ephephile kwazise ibingekho inxanxathela kuleya ndawo.
UReddy ugqugquzele abanye osomabhizinisi ukuthi bangadikibali noma beyiswa ezinkantolo ngabanye kodwa baqhubeke nokuza nezinhlelo ezizoletha impilo engcono kubantu.
Ekhuluma ngomlomo kaMnuz Brian Mpono ophethe ezokuxhumana e-Edison Corporation, uthe kudle uR500 million ukwakhiwa kweKwaDukuza Mall futhi abantu bayakujabulela ukuba khona kwayo.
“Ngaphambi kokufika kweKwaDukuza Mall abantu bebepaka emgwaqweni uma beya ezitolo. Ukuba nenxanxathela kusho ukuthi banendawo ephephile yokuthenga, bayakwazi ukupaka ngaphandle kokusaba ukuthi bazonikwa amathikithi okuvimba ezinye izimoto emgwaqweni,” kusho uMpono.
Uthe ukuvulwa kweKwaDukuza Mall bekuhlehlisiwe ngenxa yokuthi bekunabantu abafake izicelo enkantolo kodwa yonke imithetho yokwakha nokuphepha ilandeliwe yingakho uMasipala waKwaDukuza usikhiphile isitifiketi sokuthi mayivulwe.
“Ngesikhathi ivulwa kufike abantu abawu-8500 bezothenga, lokhu kuyasikhombisa ukuthi bebeyidinga. Sinezitolo ezinkulu okubalwa kuzo uCheckers, Pick n Pay, Woolworths nezinye. Sezizonke izitolo eziKwaDukuza Mall ziwu-70,” kusho uMpono.
Uthe ukwakhiwa kwenxanxathela yezitolo kube yintuthuko yokuqala enkulu KwaDukuza kule minyaka ewu-30 eyadlula.
Ngaphandle kokudala amathuba omsebenzi inxanxathela yezitolo izongenisa phakathi kukaR30 noR40 million wama-rates kuMasipala waKwaDukuza.
Ngaphambi kokuvula inxanxathela yezitolo uReddy wavula isikhungo esiqeqesha intsha ngamakhono iKwaDukuza Skills Centre eyakhiwa ngoR700 million. Abadinga amakhono bebefunda mahhala.
Uphinde axhase izikole ezingenzi kahle ku-matric kusukela ngo-2015.