Uzomela iKZN olima endaweni encane
UZOMELA iKwaZulu-Natal emncintiswaneni kazwelonke ovumbulula osomabhizinisi abancane i-ENGEN Pitch & Polish, uMnuz Mongezi Dlamini, oza nendlela yokulima engadli umhlaba omningi.
UDlamini uthe okwamenza weza nesu wukubona ukuthi abantu abaningi banenkinga yomhlaba uma befuna ukuba ngabalimi abadayisa ukudla ukuze benze imali.
“Osomabhizinisi bayakuthanda ukulima mina ngiza nendlela entsha yokulima kuhle kwabalimi abanamapulazi amakhulu kodwa kube kusetshenziswa indawo encane. Udaba lomhlaba lusematheni kulezi zinsuku ngakho abalimi bakusasa kufanele baqinisekise ukuthi bawusebenzisa ngendlela ekahle,” kusho uDlamini.
Ngesikhathi ezama ukuheha amajaji emcintiswaneni we-Engen Pitch & Polish obuseThekwini, uDlamini walushintsha kaningi uhlelo lwakhe lwebhizinisi wagcina esenqobile ngesikhathi ebuzwa ukuthi uheha bani.
Amajaji athi ukushintsha kwakhe kwakhombisa ukuthi uwusomabhizinisi okwaziyo ukuza nohlelo olucacile.
UDlamini uwine uR6 000 nokuqeqeshwa isonto elilodwa yiRaizcorp kaMnuz Alon Raiz oyisazi sokukhangisa futhi odume ngokuthenga izinkampani.
Uhlelo lokuqeqeshwa yiRaizcorp lubiza uR150 000.
Selokhu yasungulwa i-Engen Pitch & Polish isisize osomabhizinisi abawu-11 000. Ihlelwa yi-Engen Petroleum Ltd, Nedbank neRaizcorp.
Abanye akade bencintisana eThekwini ngoNksz Shiroma Bennimahadeo osemkhakheni we-biomedical engineering, uMnuz Ayanda Magubane, onenkampani yokuhlanza izindlu ehambela abantu emizini yabo, uNksz Phumzile Manana onenkampani ekhiqiza iphalishi noNksz Jacqueline Mccarroll onenkampani eyonga ugesi namanzi uma umuntu egeza.
UNksz Alta Keyter oyiJaji kwi-Engen Pitch & Polish uthe umncintiswano ubalulekile ngoba usiza osomabhizinisi babe nolwazi lokuheha abatshalizimali.
Uthe osomabhizinisi kufanele bazibuze ukuthi badayisani, bayidayisela bani, yiziphi izingqinamba ezikhona emkhakheni abafuna ukungena kuwo futhi uma sebekhuluma nabatshalizimali babe nokuzethemba.
Uma abatshalizimali bebachitha uNksz Keyter uthe kufanele bakwamukele lokhu kodwa bafunde ezelulekweni abanikwa zona ngoba abatshalizimali abavele nje bamchithe usomabhizinisi kodwa bayamnika izizathu eziholele kulokhu.