‘Siwafuna wonke amaphuzu’
UMQEQESHI weBafana Bafana, uStuart Baxter, ufuna abadlali bakhe baye emdlalweni wabo neSeychelles bekukhiphe bakuqede emakhanda ukuthathisa leli lizwe okompushana kunobhutshuzwayo.
Imidlalo emibili neSeychelles yokuhlungela i-Africa Cup of Nations (Afcon), ongoMgqibelo eFNB Stadium ngo-3 ntambama nangoLwesibii ekuhambeni, ibaluleke ngendlela exakile kuBaxter neqembu lakhe njengoba kulindeleke ukuthi bayinqobe ngamalengiso.
Isizathu salokhu wukuthi isikwati seSeychelles sakhiwe ngabadlali abangama-amesha njengoba ingekho iligi ekhokhelayo kuleli lizwe eliyisiqhingi.
Abadlali bayo banemisebenzi esemaceleni abaziphilisa ngayo.
Lokhu kukodwa kukhomba ukuthi amazinga abadlali awafani kwazise iBafana ibophele nabadlali abagijima kumaligi ahlonishwayo emhlabeni.
Esinye isizathu esenza ukunqoba kwiSeychelles kube mqoka wukuthi iBafana ayikho ezinhliziyweni zabalandeli abaningi bakanobhutshuzwayo ngenxa yomkhuba wayo wokuthwaliswa kanzima ngamaqembu angaphansi kwayo ekuklelisweni ohliwini lweFifa. Ngenyanga edlule eMoses Mabhida Stadium kuwona umdlalo wokuhlunga, ibhuquziswe iLibya umdlalo wagcina uphele ngo 0-0, ilahla amaphuzu amqoka.
Kuyimanje ihleli endaweni yesibili ngamaphuzu amane alinganayo naweLibya eyabhabhadisa iSeychelles ngo 5-1 emdlalweni wabo wokuqala. ISeychelles iphinde yabhaxabulwa iNigeria ngo 3-0 ngenyanga edlule. AmaSuper Eagles adlala neLibya ngempelasonto asendaweni yesithathu.
“Uvalo, nokuzazisa yizona izinto ezisicindezelayo ekutheni sikwazi ukudlala ngendlela esiyaziyo ukuthi singadlala ngayo. Uma sidlala ngokuzimisela njengoba senza (esho kade iBafana iziqeqesha) sizokwazi ukudlula. Khona kuzothatha isikhathi. Ngibabonile bedlala neNigeria nakuyona kwathatha isikhathi ukuthi ibangene,” kusho uBaxter.
Uthe akafuni abadlali bawuthathe kancane umdlalo njengoba kwenzeka nyakenye elakuleli libhekene neCape Verde eyagcina ibashaya ekuhambeni nasekhaya kuhlungelwa iNdebe yoMhlaba.
“Ngicabanga ukuthi sashaya eceleni ngokuthi (iCape Verde) iyiqembu elincane. Yebo bayizwe elincane kodwa banabadlali abahle njengoba bakwazi nokuthwalisa kanzima iSenegal. Nakanjani ngicabanga ukuthi kulo mdlalo akumele sibe nomunye umcabango ngaphandle kokuthi sifuna amaphuzu ayisithupha. Akumele nakancane kube khona omunye esimeyayo, sesikwenze kakhulu lokho okwenza sigcine sidembesela. Sifuna ukuqinisekisa ukuthi sibuya nawo amaphuzu ayisithupha noma ngabe ngubani ozobe esenkundleni,” kusho uBaxter.
Khonamanjalo kusho elayizolo uSibusiso Vilakazi esephumile eqenjini leBafana ngemuva kokudonseka umsipha bebhekene neSuperSport kowesihle izolo. Abanye abadlali okuphoqeleke ukuthi baphume kwelesizwe uVincent Pule noThapelo Morena.