Ubonga ithuba lokudlala kumaBhokobhoko
UBONGA uyanconcoza ngethuba alinikwe wumqeqeshi wamaBhokobhoko uThomas Du Toit oyi-prop kwiCell C Sharks.
UDu Toit ubeyingxenye yeqembu likaRassie Erasmus kulo nyaka.
Empeleni uDu Toit (23), udlale amahlandla amahlanu kumaBhokobhoko ngaphansi kuka-Erasmus nonyaka. Udlale emdlalweni wokuqala ka-Erasmus lapho ayebhekene khona neWales, eWashington DC, waphinde wadlala imidlalo emithathu yeTest elakuleli libhekene ne-England ngoJuni ngaphambi kokudlala umdlalo owodwa weRugby Championship, amaBhokobhoko awudlala ne-Argentina, eThekwini.
UDu Toit uthe nakuba engazange esadlala ngemuva kwalokho kodwa kuningi akuzuzile kulesi sikhashana abe naso namaBhokobhoko.
“Ngijabulile ngethuba engilithole kumaBhokobhoko, kube wukufezeka kwephupho lami. Ngifunde lukhulu kulesi sikhathi, nginethemba lokuthi ngizophinde ngibuye kungekudala kwelesizwe,” usho kanje uDu Toit ngemuva kokuziqeqesha neSharks.
UDu Toit uzoba yingxenye yeSharks ezodlala neTafel Lager Griquas emdlalweni weCurrie Cup, ozoba seKimberly, eTafel Lager Stadium ngoMgqibelo ngo-3 ntambama.
Uma iSharks inganqoba lo mdlalo ngephuzu lebhonasi, izogudluza iWestern Province esicongweni se-log.
“Akufanele nakancane siyizwele iGriquas ngoba sithi ayibanga nesizini enhle. Ukunqoba kahle kwiGriquas kuzokwenza ukuthi imidlalo emibili elandelayo siyidlalele ekhaya. Ngakho kuzofanele siqinise isandla impela ngoba nayo iGriquas izofuna ukuvala isizini ngokushaya thina,” ubeke kanje uDu Toit.
Emasontweni amabili edlule, iSharks ishaywe kabuhlungu yizimbangi zayo ezinkulu iProvince ngo 50-28.
“Ukushaywa kwethu yiProvince kusiphaphamisile. Kusenze sabona ukuthi sisemhlabeni lapha ngakho sizozibamba ziqine kusuka manje. Nasekhempini abadlali banomoya owodwa wokufuna ukwenza kangcono kunalokhu okwenzeka eKapa,” kuphetha uDu Toit. Imidlalo yeCurrie Cup imi kanjena: Kusasa iCollege Pumas v Xerox Golden Lions (7pm, Mbombela Stadium) NgoMgqibelo Tafel Lager Griquas v Cell C Sharks (3pm, Tafel Lager Park), Vodacom Blue Bulls v DHL Western Province (5.15pm, Loftus Versfeld).