Uzoya eDublin ayoqedela ezokuqeqesha
UBUYELA phesheya kwezilwandle ngonyaka ozayo ukuyoqedela izifundo zakhe ze-Uefa Licence B owaduma kwiBafana Bafana, uKagisho “KG” Dikgacoi, osabambe izintambo zokuqeqesha kwiRoyal Eagles.
Inhloko yabaqeqeshi kwiEagles, uRoger Sikhakhane, iyalulama ekhaya ngemuva kokuhlinzwa.
UDikgacoi ubambe izintambo noSazi Ngubane bese kuba noBafana Nhlapo ocija onozinti eqenjini eligijima kwiNational First Division (NFD).
UDikgacoi uthe ubuyela ngonyaka ozayo phesheya kwezilwandle.
“Ngizobuyela eDublin ngoMeyi ukuyoqedela iziqu zami ze-Uefa B Licence. Ngijabule ngokuthi sengilutholile usuku oluqondile,” kusho uDikgacoi.
Selokhu enikwe izintambo njengoba uSikhakhane esalulama ekhaya, uDikgacoi nethimba lakhe basadliwe kanye banqoba imidlalo emibili.
Baqumbe phansi i-University of Pretoria ngo 1-0 kwathi kusenjalo bashaya Uthongathi FC ngo 1-0 kodwa ngempelasonto beguqiswe yiReal Kings ngo 2-1.
“Ngisafunda. Kubi ukuthi uthisha wami akekho njengamanje. Ngiyayithakasela inselelo engibhekene nayo njengamanje. Umdlalo nomdlalo ngizokhula. Ngikakwe ngabantu abakhaliphile kuSazi noBafana. Sisebenzisana kahle nabo,” kusho le nsika eke yadlala kwi-English Premier League emaqenjini afana neFulham neCrystal Palace.
I-Eagles ithake isikwati sayo ngabadlali abafana noDavid Booysen, Andile Fikizolo, Lewis Macha noKhanyisa Mayo.
“I-Eagles ibophele inqwaba yabadlali abanekhono. Lokhu kwenza kube nzima ukuthi uqoke abawu-11 abazoqala umdlalo nabawu-18 osuke uzohamba nabo. Bonke usuke ubona ukuthi bakufanele ukuba seqenjini elisuke lizodlala. Nokho ekugcineni udinga isibindi ukuze wenze izinqumo osuke ucabanga ukuthi zizohlomulisa iqembu, “kusho uDikgacoi.
Ngo-Okthoba 20, i-Eagles izobhekana neTS Galaxy eChatsworth Stadium ngo-3.30 ntambama.
“Ziningi izindawo okusamele siqinise kuzona. Ngizobanika izinsukwanyana zokuphumula bese bebuyela ensimini ukuze silungise amaphutha ethu. Kufanele kushaye isikhathi sokubuya ekhefini leFifa sesikulungele ukubhekana neTS Galaxy,” kuphetha uDikgacoi.