AmaZulu neDowns kwiLegacy Cup
OMPETHA be-Absa Premiership, iMamelodi Sundowns, bazoletha zonke izihlabani zabadlali baleli qembu emdlalweni wesihle abazowudlala naMaZulu FC, emqhudelwaneni iMangosuthu Legacy Cup ngoMgqibelo, ePrince Mangosuthu Buthelezi Stadium Olundi, ngo-3 ntambama.
Lezi zindaba ziqinisekiswe okhulumela amaBrazilians uThulani “TT” Thuswa izolo exoxa neSolezwe.
NgokukaThuswa, abadlali abakwiBafana Bafana ezoshikilisana neSeychelles emidlalweni emibili yokuhlungela i-Africa Cup of Nations (Afcon), yibona kuphela abangayi Olundi.
“Ngiyethembisa ukuthi sizobaletha bonke abadlali bethu abathandwa abalandeli bethu. Abangeke babonakale abadlala kwiBafana. Inhloso yethu ukuthi banikwe ithuba nabangajwayele ukudlala ngoba silungiselela imiqhudelwano eminingi esizoba yingxenye yayo njengoba nesizini iqhubeka,” kusho uThuswa.
La maqembu asanda kudlala ingcwenga yebhola emdlalweni we-Absa Premiership owawungoSepthemba 16, eKing Zwelithini Stadium, eMlaza owaphela ngo 3-3. NgokukaThuswa, bazizwa bethobekile ngokuba kulo mqhudelwano.
“Umlando weLegacy Cup ujule kakhulu. Ubudlelwano bethu noSuthu buya ngokuya buqina futhi siyabuthokozela kakhulu ,” kusho uThuswa.
Kubadlali okulindeleke babonakale Olundi kukhona u-Andile Jali, Oupa Manyisa noGeorge Lebese ukubala abambalwa.
Okhulumela AmaZulu FC, uBrilliant Mkhathini, uhambe emazwini kaThuswa.
“Nathi sizoletha abadlali bethu bonke abadlala eqenjini elikhulu. Inhloso yalokhu ukuthi sizobe silungiselela umdlalo weTelkom Knockout (TKO), esizowudlala neCape Town City. Okubaluleke kakhulu ngomqhudelwano ukuthi sizobe sihlonipha uMntwana waKwaPhindangene siphinde silethele nabantu basoLundi umdlalo osezingeni eliphezulu, nokungavamisile kuleya ndawo,” kusho uMkhathini.