Kunengqungquthela yokuphepha ezikoleni
SEKUBIZWE ingqungquthela ezobhekana nokuphepha kothisha nabafundi ezikoleni zakuleli ngemuva kwezehlakalo zokugcweleza kubalwa nokubulawa kukathisha eNorth West.
UNgqongqoshe weMfundo eyisiSekelo uNkk Angie Motshekga ubize le ngqungquthela ukuze athole amasu angasetshenziswa ukunqanda lesi sihlava.
Okhulumela umnyango, uMnuz Elijah Mhlanga, uthe inhloso yale ngqungquthela ukuhlanganisa imibono ehlukene ngalolu daba olubakhathazayo lwezokuphepha.
Uthe kubizwe izinhlaka ezehlukene ukuzobeka imibono ngezinto okumele zenziwe.
Mihla le izinyunyana zothisha zikhala ngokungaphephi kothisha ezikoleni.
“Sifuna ukuthi izikole ziphephe yingakho sibize abantu abahlukene ukuzosicebisa ukuthi kufanele senzenjani. Sibhekene nezehlakalo zodlame ezikoleni kanti sethemba ukuthi le ngqungquthela izohlahla indlela eya phambili.”
Uthe into eseqhulwini ezobhungwa yiqhaza lezigungu ezilawula izikole kwezokuphepha kanjalo nokuqinisa imikhankaso efana nokuthi isikole sisebenzisane namaphoyisa.
UMengameli weNatu, uMnuz Allen Thompson, uthe bayayeseka yonke imizamo yokwenza izikole ziphephe.
Uthe bazothumela ithimba elizomela le nyunyana.
“Sizothumela ithimba eliholwa nguSolwazi Sitwala Imenda, ophethe isikhungo iNatu Institute. Sinomqulu esiwenzile ongasiza umnyango ngezokuphepha ezikoleni,” kusho uThompson.
Okhulumela iSadtu uNksz Nomusa Cembi, uthe bayayamukela yonke imizamo yokuqinisekisa ukuphepha ezikoleni.
Uthe othisha bagcwelezwa yizingane ezikoleni nokuthi umthetho uvuna abafundi.
Ingqungquthela inamhlanje eSt George Hotel ePretoria kusuka ngo-8 ekuseni.
Selokhu kwavalwa induku azikho ezinye izindlela othisha abazisebenzisayo ukuqondisa abafundi.
Izinyunyana zakhala ngokuthi ukuhlalisa abafundi ngemuva kwesikole ukubajezisa kwenza othisha bagcine sebehlala ngoba kufanele babagade bangabashiyi bodwa.