Sihluphekiswa ngenhloso yokugaya amavoti
MHLELI: Indlela asebephawula ngayo abaholi bezepolitiki iyakhomba ukuthi ukhetho seluseduze. INingizimu Afrika isenkingeni yobubha.
Uma uhamba cishe kuzo zonke izindawo ezihlala abantu abamnyama, izixongololo emigwaqweni. Njengokulindelekile iningi kusuke kuyintsha. Amaqembu ezombusazwe ajabula afe uma kunje ngoba ukwanda kwabantu abahluphekayo kusho ukwanda kwabantu abaphethe ivoti. Kuliqiniso ukuthi amaqembu akhankasa ezindaweni ezifana nasemalokishini, emakhaya, emijondolo nasemahostela kuphela. Uma kukhankaswa ezindaweni ezihlala abantu abangahlupheki kufakwa izingqwembe emgwaqweni kuphela. Abayi bona siqu ngoba abantu abanemali abalaleli noma ubani futhi benjalo nje banenkululeko yokubuza noma yini abangayiqondi kahle.
Kulihlazo ukuthi iNingizimu Afrika isenengxenye yomphakathi ojabulela ukuphiwa isikibha sikasopolitiki esibiza uR15. Kulihlazo ukuthi sisengumphakathi ojabulela ukuthi usopolitiki thizeni ubesiphathele izijumbane zokudla okunikelelwa ngamaSulumane okunye okusuke sekudlulelwe yisikhathi.
Uma ngike ngathola ithuba lokukhuluma emphakathi ngihlale ngibeluleka abantu ngosombusazwe. Osopolitiki abanandaba nawe, into abayifuna kuwe yivoti lakho nje kuphela. Uma usubavotele kusuke sekulungile. Njengoba kuza ukhetho nje imikhankaso izobe ithe chithi saka.
Ngingajabula uma kwenye yamarali ungabuza umholi okhankasayo ukuthi njengoba elapha nje zikuphi izingane zakhe. Impendulo elindelekile ingase ithi ziphesheya noma zikhonjwe kwesinye isifundazwe okanye zisekhaya kukhona okuzibambile nazo bezifisa ukuza lapha. Izingane zosopolitiki zihlala koKloof, Randburg, Silverton nakoSandton.
Uma sonke singahlala ezindaweni ezifana noFourways no-Elado Spark bayazi ukuthi akukho muntu ongaphinde azixake ngendaba yokulalelana nabo yingakho bengafuni ukuthi kuphele imijondolo nabantu abahlwempu.Yize i-ANC kuyilona qembu lezombusazwe elinomlando ocace bha mayelana nokukhululwa komuntu omnyama emaketangweni obandlululo kodwa nayo isisezandleni zabantu abazicabangela bona. Ufakazi wakhokonke lokho amakhomishini aphenya ngenkohlakalo cishe kuyona yonke iminyango kahulumeni nakuyena uhulumeni uqobo. Selokhu izintambo zithathwe nguMengameli Ramaphosa kuvela amahlazo wodwa ngosombusazwe baseNingizimu Afrika.
Ngeshwa ke alikho iqembu lezombusazwe elingenza kangcono kunaleli elikhona njengamanje. Yini nje esile umphakathi waseNingizimu Afrika ongayilindela kwiDA, IFP, COPE noma i-UDM. Kucishe kube ngconywana okwe-EFF ngoba yona ingenza abantu abamnyama babumbane yize ngingazi ukuthi ingalibona yini elidlalayo ekukhuliseni umnotho. Eugine Biyela