Siphelile isiteleka sabakwa-EPWP
SIPHELILE isiteleka sabasebenzi be-Expanded Public Works Programme (EPWP) abasaphaze udoti emigwaqweni yeTheku ngoba befuna ukuqashwa ngokugcwele kwamasipala.
Izolo abasebenzi akade betelekile bathe babe nomhlangano neSouth African Municipal Workers Union (Samwu) banquma ukumisa isiteleka ukuze umasipala avule izingxoxo ukuze babeke isikhalo sabo sokuthi bafuna ukuqashwa ngokugcwele.
Bathe udoti uqale ukuqoqwa izolo ntambama ngoba abasebenzi abangena ebusuku bebezowuqoqa udoti obusuduve izinsuku ezimbili emgwaqweni.
Esitatimendeni esithunyelwe kwabezindaba, iMeya yeTheku uNkk Zandile Gumede ithe ishaqekile ngesiteleka esingekho emthethweni esiholele ekungcolisweni kwemigwaqo esenkabeni yedolobha.
Ukhale ngokuthi abasebenzi abatelekile basohlelweni lwe-EPWP okuwuhlelo olusiza abampofu ngamatoho abasiza ukuthi bathole izidingo.
“Siwubuholi bedolobha siyakuqonda ukuthi isimo sinzima kuwo wonke umuntu okubalwa nabasebenzi bethu kodwa lokhu akusho ukuthi abantu abaye esitelekeni esingekho emthethweni. Asikwazi ukungcolisa idolobha siphazamise nokuqoqwa kukadoti uma sinezinkinga, lokhu akuzixazululi izinkinga zethu kodwa into ezozixazulula wukuthi sibonisane,” kusho uNkk Gumede.
Uthe uyaxolisa kakhulu ngokuphazamiseka kokuqoqwa kukadoti okuhlukumeze izakhamuzi zeTheku.
“Isiteleka sesiphelile, siyathemba isimo sizobuyela kwesijwayelekile maduze. Siyaxolisa kakhulu kubantu baseThekwini ngokuphazamiseka okwenziwe wukungaqoqwa kukadoti,” kusho uNkk Gumede.