Isiphinde yahlehla futhi eye-ANCYL
ISIPHINDE yahlehla ingqungquthela yophiko lwentsha lwe-ANC, i-ANC Youth League ebekumele ibe ngelizayo eNasrec eGoli njengoba ihlehlele uDisemba.
Le ngqungquthela isihlehle izikhawu eziningi kanti ngokwesitatimende esikhishwe yilolu phiko, isizoba ngoDisemba 10 kuya ku-16 khona eGoli.
Okhulumela lolu phiko uMnuz Mlondi Mkhize, uthe isigungu esiphezulu salolu phiko siyalele ikomiti elibhekele ukusebenza kwansuku zonke kwalolu phiko ukuthi lusebenze nethimba elijutshwe yi-ANC ukubheka izinhlelo zengqungquthela. “Lesi sinqumo sithathwe ngemuva komhlangano wesigungu esiphezulu ebesingeSonto ePitoli. Kulo mhlangano bekukhona namalungu esigungu esiphezulu se-ANC. Lawa malungu asilusa ngezinto ezithinta ipolitiki kanjalo nezithinta inhlangano ukuze sibe nengqungquthela ngaphambi kokuphela konyaka.”
Uthe ezinye zezinto abazixoxile ukwehla kokwesekwa kwenhlanganisela yezinhlangano zezitshudeni ezidlelana ne-ANC iProgressive Youth Alliance eholwa yiSasco ezikhungweni zemfundo ephakeme.
Uqhube wathi bakholelwa ngukuthi ukwehlukana phakathi kwalezi zinhlangano nombango yikhona okwenze kwaba nokwehla kokwesekwa. “Sifuna iPYA ibumbane ukuze ikwazi ukuthola ukwesekwa yizitshudeni. Kumele kubunjwane ngaphansi kweSasco.”
Uthe njengoba intsha engasebenzi eneziqu ingaphezulu kuka-50%, bayayamukela ingqungquthela yakamuva ebibheka indaba yemisebenzi.
“Sifuna kuqedwe indaba yokuthi kufunakale isipiliyoni uma uzothola imisebenzi esezingeni eliphansi. Akwehle inani le-data ukuze abafuna umsebenzi bakwazi ukwenza izinto zabo kalula. Akwandiswe imali enikwa iNYDA ukuze lesi sikhwama sikwazi ukubhekana nezidingo zentsha.”
Uthe ngenxa yokwanda kwezehlakalo zodlame ezikoleni bazoxoxa neSadtu kanjalo neCosas ngalezi zehlakalo.
Uqhube wathi basamile ekutheni iBhage loMbuso iSouth African Reserve Bank kumele lifakwe ngaphansi kokulawulwa nguMbuso.
“Sifuna uhulumeni athathe isinqumo esingujuqu ngokunyuka kwezidingo ikakhulu uphethroli. Ukunyuka kwawo ngale ndlela kwenza ukuthi abasebenzi bashayeke. Kumele uhulumeni akunqande ukunyuka ngale ndlela kukaphethroli.”