Siyakhula isibalo sabadlali beSundowns abalimalayo
KUSHAYISA ngovalo ukwanda kwabadlali abamqoka beMamelodi Sundowns abalimele emuva kokuhoxa kukaSibusiso “Villa” Vilakazi kwiBafana Bafana enomdlalo omqoka wokuhlungela i-Africa Cup of Nations (Afcon) ezoba seCameroon ngonyaka ozayo.
Usuku lwangoLwesithathu luphele ngokuthi iSouth African Football Association (Safa) iqinisekise ukuthi uVilakazi ngeke esaqhubeka nekhempu eseGoli. Lokhu kukhulisa isibalo sabadlali beSundowns abasazohlala bengadlali. UVilakazi ubesengumdlali wesibili weSundowns ukuhoxa kwiBafana kaStuart Baxter.
Kuqale kwahoxa uThapelo Morena (osesithombeni) olimale ngosuku olulodwa no-Anele Ngcongca. UVilakazi useyengeza phezu kwalaba badlali. Konke kwenzeke umqeqeshi weSundowns, uPitso “Jingles” Mosimane, esanda kumemezela ukuthi balimele o-Aubrey Ngoma, George Lebese, Anthony Laffor noThemba Zwane bonke abanezinkinga ezehlukene.
Likhona nokho ithemba lokuthi kungenzeka ukuthi libasize ikhefu elivele ngenxa yemidlalo yeFifa ngoba lizobanika isikhathi esanele sokululama ngokugcwele ngaphambi kokuthi zibuyele emidlalweni ye-Absa Premiership neyeCAF Champions League.
Ngesikhathi eqinisekisa indaba kaVilakazi udokotela weBafana, uThulani Ngwenya, uthe udonseke umsipha ohlanganisa isihluzu nesithende. Lokhu kuvamise ukuthatha isikhathi eside ngakhoke kubona bonke abadlali abalimele kwiSundowns, uVilakazi uyena ongase abuye ekugcineni.
“Ulimale kabi uVilakazi esonseka umsipha ohlanganisa isithende sakhe nesihluzu. Ngemuva kokukhuluma kwethimba labaqeqeshi kuphunywe nesinqumo sokuthi akulandwe omunye umdlali endaweni yakhe ngoba le midlalo mibili esikhathini esifushane,” kusho uNgwenya.
Indawo kaVilakazi ithathwe nguGift Links (19) weCape Town City okumenza abe ngomncane kunabo bonke ekhempini kaBaxter. Kungenzeka ukuthi lokhu kulinyalelwa kweSundowns kuveze amathuba kubadlali abawo-Oupa Manyisa abangasalazi ijezi nabo ngenxa yokulimala.