IComrades ikhuphule imali yabazodla ubhedu
USALE elolekile umpetha wanyakenye weComrades Marathon, uBongmusa Mthembu, ngemali elinganiselwa ngaphezulu kuka-R1 million engatholwa umgijimi ozogila izimanga ngonyaka ozayo.
Izolo ngesikhathi kwethulwa umjaho wango-2019 onesiqubulo esithi “Sizonqoba”, abahleli baveze ukuthi isinyukile imali ezohlonyulwa umpetha wesifazane nowesilisa. Umjaho uzokuba ngoJuni 9 usuka eThekwini uyophela eScottsville Racecourse, eMgungundlovu. Ibanga lizobe liwu-86.73km.
Abazodla ubhedu bazothola uR500 000 emunye osuka kuR440 000. Owokuqala waseNingizimu Afrika uzothola u-R200 000 bese kuthi owokuqala waKwaZuluNatal adle uR45 000. Ozokwephula irekhodi lokwenyuka uzothola uR500 000 ngaphezulu.
Irekhodi labesifazane elinyukayo liwu-6.09.24 elabekwa umgijimi waseRussia u-Elena Nurgalieva ngo-2006. Elabesilisa elabekwa uLeonid Shvetsov ngo2008, liwu-5.24.49.
“Sijabula kakhulu ngokuthi iComrades Marathon isisikhombisile ukuthi ngonyaka ozayo izomisa kanjani. Okujabulisayo wukuthi siyabona nemali bayishintshile engicabanga ukuthi yikhona thina bagijimi esisuke sibheke imiklomelo ethile esisuke sikubheke kakhulu.
“Ngiyethemba ukuthi kusukela manje wonke umgijimi uzozimisela ngempela okusho ukuthi nakuBongmusa kunjalo. Ukubona indlela okumi ngayo imiklomelo kusho ukuqala nokushintsha kwezinto okwenza amalungiselelo abe sezingeni eliphezulu kakhulu,” kusho uMthembu.
UMthembu oseyinqobe kathathu iComrades uvumelana nabathi umpetha kumele athole isigidi esingahlanganisiwe neminye imihlomulo.
Ukufakwa kwezicelo zokugijima kuzovulwa ngo-Okthoba 19 kuze kuvalwe ngoDisemba 10.
Isikhathi sokuqala ukuzibekisela izikhathi ezizokufaka kwiComrades u-Agasti 26 kanti kuyoze kuvale ngoMeyi 2 ngeWally Hayward Marathon. Sehlisiwe isikhathi sokungenela njengoba sekuwu-4.50 ku-42.2km bese kuba u-6.45 ku-56km.
Kuvulwe izikhala zabagijimi abawu-25 000 ukuthi bangenele kanti isikhala sokungena kulabo abazothatha izindawo zabahoxayo kuzoba uMashi 1 kuya ku-Ephreli 15 ngo-2019. Kuphinde kwafakwa izindondo ezimbili ezintsha iRoche Kelly yabesifazane abazophuma endaweni ka-11 benze isikhathi esingaphansi kuka-7.30.00. Lokhu kusho ukuthi alisekho isiliva kwabesifazane.
Kwabesilisa kwethulwe indondo kaRobert Mtshali ezotholwa abesilisa abazogijima ngaphansi kwamahora ayishumi. UMtshali waba owokuqala omnyama owagiima iComrades ngo-1935 eqeda ngo-9.30 kanti uRoche Kelly waba owokuqala wesifazane ukugijima u-7.30.