Abafunde abagaqele ezeSafa: Bartlett
UYAVUMELANA nokuthi kwandiswe izinkakha kwiSouth African Football Association (Safa) naseqenjini lesizwe iBafana Bafana kodwa uthi nemfundo ibalulekile uShaun Bartlett obengumgadli eqenjini lesizwe kusuka ngo-1995 kuya ku-2005.
UPhilemon “Chippa” Masinga, naye oyinkakha edlalele iBafana, usanda kuthi uyakuthokozela ukwanda kwezinkakha kwelesizwe, nakuba efisa ukuthi zingene zithi shi kwiSouth African Football Association (Safa) ngoba ukholelwa ekutheni idinga ushintsho.
UBartlett uthe kuwumqondo omuhle ukusondeza abantu abakuqonda kangcono ukubaluleka kokudlalela iqembu lesizwe (izinkakha) kodwa kungakuhle nazo izinkakha ziwufundele umsebenzi ezisuke zifuna ukuwenza kwiSafa noma kwiBafana.
“Kuhle ukwanda kwezinkakha eqenjini lesizwe kodwa kungakuhle nathi sizihluphe ngokufunda ukuze sizongena emkhakheni esiwufundele. Akufanele nakancane sikhohlwe yisipiliyoni izinkakha ezinaso, ngoba singasiza kakhulu abadlali bamanje ngokwesimo somqondo nokuzethemba. Noma-ke kunjalo izicucu zibalulekile kakhulu,” usho kanje uBartlett engxoxweni naleli phephandaba izolo.
Ukhuluma kanjena nje uBartlett, uyingxenye yethimba labaqeqeshi kwiBafana ezobhekana neSeychelles, emidlalweni emibili yokuhlungela i-Africa Cup of Nations (Afcon).
Umdlalo wokuqala uzoba seFNB Stadium kusasa ngo-3 ntambama, owesibili uzodlala ngoLwesibili ekuhambeni.
Isolezwe libuze uBartlett ukuthi uzizwa kanjani ngokuqokwa wuStuart Baxter ukuba azosebenzisana naye kwiBafana.
“Ngijabule kakhulu ngokuba yingxenye yeBafana, nakuba kuzoba yinto yesikhashana. Ngiyethemba ngizoba wusizo kubadlali nasethimbeni labaqeqeshi ngesipiliyoni enginaso nolwazi. Ngike ngadlala ngaphansi kukaBaxter ngisengumdlali ngakho uyangazi kahle. Ngilapha (kwiBafana), ukuzomlekelela kwafisa ukukuzuza,” ubeke kanje uBartlett.
Imidlalo kaGroup E phakathi kweBafana neSeychelles ibaluleke kakhulu kwezikaBaxter njengoba zinamaphuzu amane, emidlalweni emibili. Amanye amazwe akuleli qoqo yiLibya neNigeria, esazodlala neBafana emlenzeni wesibili.
UBartlett uthi abafuni ukuzifaka ingcindezi ngemiphumela, kodwa bafisa ukwenza konke ngendlela enkundleni, ngaleyo ndlela bazoyithola imiphumela. “Ngifunde ukuthi uma ulindele lukhulu entweni noma kumuntu uyaye uphoxeke. Okwethu thina ukuthi siye kule midlalo, ngengqondo efanele, siphinde senze izinto ngendlela efanele, namaqhinga ethu asisebenzele. Ekugcineni inhloso yethu ukuthi sithole amaphuzu ayisithupha kwiSeychelles,” kuphetha uBartlett.