IMambazo ihambele izikole eMthwalume
ABAFUNDI bezikole zaseMthwalume ebezihanjelwe yiqembu lesicathamiya iLadysmith Black Mambazo bathe bavuleke amehlo ngokubaluleka kokuthuthukisa amathalente abanawo.
Leli qembu beliqala umjikelezo walo wokuhambela izindawo ezahlukene ohlelweni iLadysmith Black Mambazo Mobile Academy.
Baqale eLuthuli High ngaphambi kokudlulela eBongucele Junior Secondary ngoLwesihlanu.
UNhlanhla Mbili ofunda uGrade 10 eLuthuli High futhi ocula eqenjini lesicathamiya, uthe ufunde ngegxathu okumele alithathe uma efuna ukuphumelela.
“Ngifunde nangokuthi kumele ubhekane kanjani nezingqinamba nabantu abakugxekayo,” kusho yena.
U-Amahle Nkomo ofunda uGrade 8 eBongucele uthe ufunde lukhulu ngokufika kweMambazo.
“Ngifunde ukuthi uma unethalente kumele ungalifihli. Mina ngikwazi ukudansa kodwa nginamahloni. Ngizozama ukuwaqeda,” kusho yena.
Uthishanhloko waseBongucele, uVuyani Nguse, uthe bajabule ngokuthi leli qembu elinomlando lihambele esikoleni sabo.
“Kusibusise ngohlobo oluyisimangaliso kakhulu ukuhanjelwa ngabantu abakhulu kangaka. UXolani Majozi (oyimenenja yeqembu) wafunda kulesi sikole ngakho nabafundi bazobona ukuthi kuyenzeka,” kusho yena.
Iqembu, ebeliphelele, liphinde lanandisa lashaya izingoma zalo elidume ngazo okubalwa kuzo ethi Leli Lungelo Ngelakho.
EBongucele baphinde bafuna iShabalala Rhythm eholwa nguSibongiseni Shabalala. USibongiseni ushaye kancane ingoma ethi Umaqondana kwahlanya abafundi nothisha ehholo lesikole.
UMajozi uthe ngempelasonto bazoya ePort Elizabeth lapho bezohambela khona izindawo ezahlukene. Bazoya futhi nase-University of Fort Hare.
Uthe ngo-Okthoba 27 bazodlulela eGoli eCradle of Humankind.