Ubesola ishende ofe nomkakhe ekhaya

IBISOLA umkayo ngokuthi uneshende indoda yaKwaNyuswa ngaseHillcrest okusolwa ukuthi idubule unkosikazi wayo maqede yazidubula.

Umphakathi wasendaweni usababaza ngokwenzeke kulo mndeni. Kuthiwa umlisa ukhiphe izingane ngamafasitela ebusuku, wathi aziye komakhelwane. Ekuseni batholwe sebeshonile.

Lezi zingane ngefunda uGrade1 nefunda uGrade 3, kuthiwa zilale kwamakhelwane. Kusolwa ukuthi abazali bazo bebefuna ukuqulisana kahle icala zingekho izingane. Umthombo waleli phephandaba osebenzela umphakathi wakule ndawo uthe uthole ukuthi izithandani bezineminyaka engaphansi kuka-35. Omakhelwane baze bayobheka ekuseni ukuthi kwenzenjani, bazithela phezu kwezidumbu ebezisekamelweni lokulala. “Sizwe sekuqhuma isililo. Saya khona. Sathola ukuthi kusolwa ukuthi indoda idubule umkayo nayo yazidubula. Akuveli kahle ukuthi bekunesikhathi esingakanani indoda isola owesifazane ngokuthi uqomile.

Kusolwa ukuthi baqale baxabana bebanga yona le ndaba ngaphambi kokuthi indoda idubule,” kusho umthombo.

Okhulumela amaphoyisa KwaZulu-Natal uLt Col Thulani Zwane, uthe amaphoyisa avule icala lokubulala nedokodo lophenyo, oluzocacisa ngezizathu eziholele ekutheni laba abebeshadile bashone.

“Kutholakale isibhamu esincane endlini ebinezidumbu, okusho ukuthi phakathi kwabo kukhona odubule omunye maqede wazidubula naye.

Okwamanje amagama abo abengakadedelwa kuze kwaziswe umndeni ngalesi sigameko, esiphenywa ngamaphoyisa aseHillcrest,” kusho uZwane.

Isithombe: DOCTOR NGCOBO ILUNGA leCPF, uMnuz Sibonelo Kheswa, ekhombisa lapho kutholwe khona isingezansi somuntu esesonakele nogebhezi

THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50.