Inhlekelele yengozi idlule nezihlobo
KUSHONE abantu abayisikhombisa okukhona abomndeni owodwa kushayisana iloli, itekisi nemoto encane eBergville.
Le ngozi yenzeke emgwaqweni uR74 ngabo-7:45 ngoMgqibelo ebusuku.
Yize kusaphenywa kodwa kusoleka ukuthi iVW polo ekhombisa ukuthi eyaseKlip River (NKR), ibisika itekisi ngesikhathi ishayisana mahlandla neloli ebeliphambana nalezi zimoto, itekisi kuthiwa nalo lishayisane neloli neVW polo. Kwi-VW polo kushone ababili endaweni yesigameko, oyedwa ugcine eshona esendleleni eya esibhedlela. Kwabebegibele itekisi kushone abane besifazane, kwalimala abaningi.
Itekisi kuvele ukuthi beyisuka eThekwini iya eQwaqwa ngesikhathi kwenzeka ingozi.
Umthombo weSolezwe uveze ukuthi abathathu abashonile kule ngozi bayizihlobo.
“Okwamanje okusavelile ukuthi laba abathathu abashone emotweni encane bahlobene. Inkinga besingakakwazi ukuxhumana nomndeni wabo, kusabonakale ngamagama abo ukuthi bayizihlobo, abesibongo esisodwa,” kusho umthombo.
Okhulumela abezimo eziphuthumayo baka-ER24 uMnuz Werner Vermaak uthe bafike endaweni yesigameko selidume ledlula.
“Sifike endaweni yesigamemo kunemoto encane, iloli netekisi. Lezi zimoto bezishayisene. Abantu abayisithupha bebevele sebeshonile kungekho esingakwenza ukubahlenga. Abane bebeshonile bebesetekisini, ababili besemotweni encane. Oyedwa ushone esendleleni eya esibhedlela. Abaningi abebegibele itekisi baziphumele ngamawindi ngesikhathi kushayisana lezi zimoto, basaphazeke emgwaqweni. Kulaba esibahlengile abayisithupha balimele kanzima, abahlanu bebelimele okungatheni. Sibalaphile sabe sesibaphuthumisa ezibhedlela ezahlukene,” kusho uVermaak.
Okhulumela amaphoyisa KwaZulu-Natal, uLt Colonel Thulani Zwane, uthe kuvulwe amacala okubulala ngokungenhloso esiteshini saseBergville emuva kokushona kwabantu abayisikhombisa.
Uthe uphenyo laamaphoyisa lusaqhubeka.
UNgqongqoshe wezokuThutha KwaZulu-Natal uMnuz Mxolisi Kaunda uthumele amazwi enduduzo ezihlotsheni zabashonile nesixwayiso ukuba ziphele izingozi ezithatha imindeni ngalolu hlobo.
“Kuyashaqisa ukuthi siyaqhubeka nokubona izingozi ezifana nalezi ebezingagwemeka emgwaqweni yaseKZN. Abashayeli bonke ngiyanxusa ukuba balandele imithetho yemigwaqo uma beshayela ukuze baphephe. Njengoba kuyinyanga yezokuthutha amaphoyisa omgwaqo agcwele emgwaqweni ukuqinisa ezokuphepha nokubheka ukuthi imithetho iyalandelwa abashayeli,” kusho uKaunda.
UMnyango uthe usalandelela ukuthola amagama abalimele kulezi zingozi ukuze kuzokwaziswa imindeni yabo.