Ubalise ngonina oweMarathon
UMPETHA womsubathi uBongmusa Mthembu uthe ubefisa ukuhlonishwa kukhona unina kwi-Old Mutual Spirit of Comrades Award 2018.
Umcimbi obuwukhazikhazi ubuse-Langeni Hotel eThekwini ngoLwesihlanu ebusuku.
UMthembu uthe yize ekujabulela ukuhlonishwa ngokuba umpetha emjahweni ka-2018 kodwa bekungamjabulisa kakhulu ukuba unina ubekhona ambone ehlonishwa.
“Umndeni wami uyaziqhenya ngami. Umama wami bengifisa ukuba abekhona namhlanje angibone ngifakwa leli bhantshi lompetha phambi kwabantu, manje akwenzekanga ngenxa yokuthi akaphilile kahle njengoba esengumuntu okhulile ngeminyaka. Ubefisa naye ukuzobona ingane yakhe ihlonishwa,” kusho uMthembu.
UMthembu uthe umndeni wakhe ose-Bulwer ubaluleke kakhulu ngoba iwona omseka kakhulu uma eziqeqesha noma sekufike ilanga lemijaho.
UMthembu uthe ukuhlonishwa ngokuba umpetha kuyamgqugquzela futhi kumenza afise ukuphinde enze kahle kulo mjaho.
Ubonge nabanye abasubathi abenza ukuthi abe ngumpetha.
“Ngiyabonga kakhulu kubasubathi abangenela lo mjaho ngoba yibona abenza uBongmusa abe umpetha. Ngaphandle kwabo ngabe ayikho iComrades,” kusho uMthembu.
UMthembu uthe ngonyaka ozayo njengoba umsubathi ozodla umhlanganiso ezothola imali engaphezu kukaR1 million kuzobe kuqhudelwana ngempela.
“Kuzobe kuyimpi. Sonke sifuna isicoco ngonyaka ozayo njengoba nomklomela umuhle kangaka,” kuhleka uMthembu.
UMthembu uhlonishwe nozakwabo wesifazane owadla umhlanganiso, u-Ann Ashworth obengekho emcimbini.
Kuklonyeliswe nentatheli evelele uMatshelane Mamabolo esebenzela i-Independent Media eGoli. Abanye abanconywe ngeqhaza labo kwiComrades kube uDean Wight noGrant Cummings ngokuqoqa imali edlule kuR300 000 umuntu emunye. Kuhlonishwe nabanye emcimbini.