Inkantolo ivune iPrasa kolwezimvume
IPASSENGER Rail Agency South Africa (Prasa) ithi kwehle umthwalo emahlombe ayo emuva kokuthi inkantolo ichithe isicelo seRail Safety Regulator (RSR) sokuhoxisa imvume yokusebenza kwezitimela kuzwelonke.
Esitatimendeni esithunyelwe yiPrasa kwabezindaba izolo, uSihlalo weBhodi, uNkk Khanyisile Kweyama, uthe ukube imvume yokusebenza kwezitimela ibihoxisiwe bekuzophazamiseka abantu abawu2 million abagibela izitimela nsukuzonke.
“Siyajabula ukuthi inkantolo isivunile mayelana nokuthi imvume yethu yokusebenza iqhubeke ngoba lokhu bekuzoba nomthelela omubi kubantu abathembele ezitimeleni ukuya ezindaweni ezehlukene. Isinqumo senkantolo sizosinikeza ithuba lokuqinisa ezokuphepha emizileni yethu ehlukene ukuze abagibeli bahlale bephephile,” kusho uNkk Kweyama.
Ngesonto eledlule iPrasa iphoqeleke ukuthi iye enkantolo emuva kokuthi iRSR iyibhalele incwadi eyazisa ukuthi izophucwa imvume yokusebenza.
Incwadi ibhalwe emuva kokushayisana kwezitimela esiteshini saseKempton Park iVan Riebeeck, eGauteng.
Isikhulu esiphezulu sePrasa, uMnuz Sibusiso Sithole, sithe sizoqinisekisa ukuthi ezokuphepha ziyaqina kunciphe nezingozi zezitimela.
“Kwehle umthwalo emahlombe ethu ngoba ukuhoxiswa kwemvume bekuzolimaza abantu abaningi. Sizoyilandela imithetho yezokuphepha yeRSR ngoba sizimisele ukuqinisekisa ukuthi abagibeli baphephile ngaso sonke isikhathi. Ngizoqinisekisa ukuthi ukuhamba kwezitimela kuphephile ngibheke nazo zonke izikhalo zeRSR. Siyabonga ukuthi imvume yethu ayihoxiswanga,” kusho uSithole.
Uthe umyalelo wenkantolo uyakucacisa ukuthi iPrasa kufanele ihlale iqaphile ngaso sonke isikhathi futhi yenze nesiqiniseko sokuthi ilandela imiyalelo yeRSR.
Udaba lwemvume yezitimela luzobuyela enkantolo ngoJuni 19 wonyaka ozayo lapho kuzobhekwa ukuthi iziqinisile ezokuphepha nokuthi zinciphile yini izingozi zezitimela.