Unqotshwe wuthando lokubhala
OBENGUMFUNDI nomhleli wezindaba kwiVuma 103 FM, uSthembiso Sibisi, ulaxaze imisebenzi ayifundele abenamava kuyo waqoma ukulandela ubizo lokubhala izincwadi.
USthembiso (42) waKwaNdengezi, uthe uthathe isinqumo sokuhosha imfe kulo msakazo ngoba esenqotshwe wuthando lokuba ngumlobi.
“Ekukhuleni kwami bengivele nginothando lwezobuciko ngoba bengibhala izinkondlo nemidlalo yeshashalazi.”
Ubonga ingqalabutho yemidlalo yeshashalazi engasekho uGibson Kente, umbhali wemidlalo yomoya neyethelevishini ongasekho, uGeorge Sithole noMbongeni Ngema.USthembiso wenza izifundo zokulingisa eTechnikon Natal (osekuyiDurban University of Technology), ezomculo nomdanso kwaseAfrika e-University of KwaZulu-Natal, ezokubhala eSchool of Creative Writing eWestville, ezokuphathwa kwabaculi eCreateSA , ezokuqondiswa kwamafilimu ezazihlelwe yiDurban Film Office nezobuntatheli e-Intec College.
Usebenze isikhathi eside esiteshini somsakazo sabantu abasha iDurban Youth Radio. Ubuye wasebenzela iphephandaba lomphakathi eZakwaZulu News efunda nezindaba esiteshini somphakathi sethelevishini iGreater Durban Television.
Ufundise ezikoleni ezehlukene okubalwa kuzona iKhethelo High eThekwini neCreative College eqeqesha amaciko eThekwini. Uhambele izindawo ezehlukene esifundazweni nomdlalo wakhe weshashalazi iConfussion.
Ngo2012 ujoyine iVuma FM njengomcosheli wezindaba nomfundi wazo nokuthe kungakapheli sikhathi esingakanani waba wumhleli wazo wagcina esengumphathi jikelele wophiko lwazo. Usegxile emisebenzini ayenza enkampanini yakhe iLaquinz Communications ebhekene nokubhalwa kwezincwadi, imidlalo yeshashalazi namafilimu nokuqeqesha amaciko.
Selokhu eshiye emsakazweni usebhale izincwadi ezimbili ethi Izibazi Zomphefumulo nethi Lashona Lingakasi kanti manje uphothula eyiqoqo lezinkondlo ethi Injula. Usephothule nefilimu emfishane ayibhale wayiqondisa ethi The Graduate.
Manje uhlela ukusabalalisa incwadi yakhe ethi Izibazi Zomphefumulo ngaphansi komkhankaso obizwa ngeFunda Mzansi okuhloswe ngawo ukukhuthaza ukufundwa kwezincwadi ezibhalwe ngezilimi zesiNguni.