Situsa ukuzimisela kweBafana Bafana ishaya iSeychelles
IQEMBU lesizwe, iBafana Bafana, likhombise ukuzimisela ngesikhathi lithela othulini iSeychelles emdlalweni wokuhlungela i-Africa Cup of Nations (Afcon) ngoMgqibelo.
EzikaStuart Baxter zibhudluze iSeychelles ngo 6-0 kwacaca ukuthi azifuni ukwenza iphutha lokusala ngaphandle kwi-Afcon ezoba seCameroon ngonyaka ozayo. IBafana izithole ihluleka ukuya kwiNdebe yoMhlaba ebiseRussia nonyaka ngemuva kokushaywa yiCape Verde kabili yize kuyizwe obekubhekwe ukuthi izitholele amaphuzu kalula kulona.
Ngaphambi komdlalo wangoMgqibelo uBaxter ukubalulile ukuthi akumele bayeye iSeychelles ngoba bangazithola besenkingeni njengoba kwenzeka ngonyaka odlule.
Bonke abadlali babukeke bezimisele kulo mdlalo ngisho nalabo abangene besuka ebhentshini. Bekungokokuqala iBafana ihlohla amagoli ayisithupha emdlalweni wokuhlungela i-Afcon.
Okuhlalukile ngoMgqibelo wukuthi iBafana ibikulangazelele ukuwina nokucaciswe wukuthi unozinti u-Itumeleng Khune bekungathi useholidini ngoba alikho nelilodwa ibhola alivimbile.
Ukuzimisela noma udlala namazwe athathwa njengamancane yinto okufanele bahlale beyenza abadlali beBafana ngoba ayikho enye indlela yokuthola amaphuzu ngaphandle kokuwina. Uma iBafana ingaphinde iwine kusasa njengoba izobhekana nezwe elifanayo ekuhambeni, kungasho ukuthi izoya nakanjani eCameroon ngonyaka ozayo. Ukuzimisela abakukhombise ngoMgqibelo kumele baqhubeke nakho kungakhathalekile ukuthi yiliphi izwe abasuke bebhekene nalo. Uma bengenza kanjalo maningi amathuba okuthi bayiwine i-Afcon okuyinto eyagcina ukwenzeka ngo-1996 ngesikhathi idlalelwa kuleli.
Nokho umdlalo wokugcina wokuhlungela i-Afcon abazowudlala neNigeria iwona oyocacisa kahle ukuzimisela kweBafana. Emdlalweni wokuqala ekuhambeni iBafana yamangaza abaningi iqumba iSuper Eagles ngo 2-0.
Abadlali abasafuna ukudlalela iqembu lesizwe bazofunda lukhulu kulaba abashaye into ecokeme ngoMgqibelo. Ukugqoka imibala yeqembu lesizwe kumele kuhambisane nokuzinikela okukhonjiswe yiBafana ngempelasonto.