Bazumbule uR25 000 kade ngingasasikhokhi isikweletu
EZABATHENGI
SELOKHU ngaqala ukubhala ngezinkinga zabathengi ezithinta amabhange alikho ibhange elingafuni ukuphendula imibuzo njengeCapitec. Nakulokhu kwenzeke esifanayo, bathunyelelwe imibuzo kodwa abazange baphendule. Ngiyanicela bathengi abanezinkinga eCapitec nizibike khona uma ningalutholi usizo nizidlulisele kumxazululi wezinkinga zamabhange.
Ngithole imibuzo emakhasimendeni ase-Absa.
*Umbuzo: NgiwuNkk Zulu kwathathwa uR6 000 kwi-akhawunti yami emuva kokuthi ngifonelwe wumuntu owathi usebenza ebhange lami i-Absa. Wathi ufuna ukuhoxisa ama-debit order kodwa kwanyamalala imali yami. Ngiyile ebhange kodwa ayikabuyi imali yami.
-Impendulo: UMnuz Khulani Qoma obhekelele ezokuxhumana e-Absa uthe yize bephoqwa wumthetho wokuthi bangadaluli imininingwane yamakhasimende kodwa bayaqinisekisa ukuthi udaba selulungisiwe nekhasimende.
*Umbuzo: NgiwuNksz Makhaye oqolwe uR5 700, ngithole ama-sms athi kukhishwe imali kwiakhawunti yami yase-Absa. Ngibikile ebhange kodwa abaqolayo bebeyikhipha ngesikhathi abasebhange bezama ukuvala i-akhawunti yami. Ngibikile ngaze ngavula icala emaphoyiseni kodwa imali yami angikakayitholi selokhu ithathwe ekuqaleni kukaSepthemba.
-Impendulo: UMnuz Khulani Qoma obhekelele ezokuxhumana uthe udaba lulungisiwe nekhasimende. Ezabathengi zimthintile uNksz Makhaye wakuqinisekisa ukuthi abaseAbsa baye bamfonela emuva kokuthintwa Ezabathengi, bamcela ukuthi athumele imininingwane ethile ukuze abuyiselwe imali yakhe.
*Umbuzo: Nginesikweletu e-Absa bengingasasikhokheli ngenxa yokuthi bengiphelelwe wumsebenzi. Ngithe uma ngithola omunye ngaya ebhange ngabazisa ukuthi sengiqashiwe futhi ngacela ukwenza izinhlelo zokukhokha isikweletu sami nyangazonke. Ngamangala uma bezumbula uR25 000. Ngibikile ebhange bathi bazoyibuyisa imali yami kodwa ayikabuyi. Ozithobayo uNgcemu.
*Impendulo : UMnuz Khulani Qoma obhekelele ezokuxhumana e-Absa uthe abakwazi ukudalula okuningi ngalolu daba ngenxa yemithetho kodwa baxhumene nekhasimende labo balungisa konke.
ISouth African Banking Risk Information Centre (Sabric) yethule umbiko wayo wobugebengu obuthinta imali lapho iveze ukuthi abantu bayaqolwa uma besebenzisa ubuchwepheshe besimanje.
Baveze ukuthi ngo-2017 babikelwe ngezigameko eziwu-13 438 zabantu abaqolwe besebenzisa ama-app okubhanga. Lezi zigameko zilahlekisele amabhange ngoR250m. Bathe kusukela ngoJanuwari kuze kube wu-Agasti ngonyaka izigameko zabaqolwa imali besebenzisa amaselula zinyuke ngo-100% kwazise sekulahleke uR23.5m kwionline banking kulahleke uR89.3m njengoba izigameko zakhona zinyuke ngo-44%. Abaqolwe besebenzisa amaapp okubhanga balahlekelwe wuR70.1m kwazise izigameko zakhona zinyuke ngo20% uma ziqhathaniswa ngesikhathi esifanayo ngonyaka odlule.
Ngonyaka odlule bawu-4 040 abantu ababike ukuthi baqolwe imali emuva kokuthola ucingo lokuthi abenze isim swap, kulo nyaka kusukela ngoJanuwari kuya ku-Agasti ziwu-8 254 izigameko esezibikiwe okusho ukuthi zinyuke ngo104%.
Isikhulu esiphezulu seSabric, uNksz Kalyani Pillay, sigqugquzele abantu ukuthi baqaphele uma besebenzisa ubuchwepheshe besimanje ukubhanga.
Ugqugquzele abantu ukuthi bangakhiphi imininingwane yabo eyimfihlo uma befonelwa ngabantu abathi bafona emabhange futhi bangaphenduli noma yimaphi ama-emails.
Bangangeni kuma-link abangawazi futhi basheshe babike ebhange uma kukhona abangakuboni kahle kumaakhawunti abo.
Ube esekhipha lamasu ambalwa:
Uma usebenzisa i-internet ukubhanga qinisekisa ukuthi i-URL yewebsite yakho iqala ngo-https hhayi u-http.
-Faka ama-password anzima ukungena kwiakhawunti yakho yakwiinternet.
-Khumbula ukuthi amabhange awasoze akucela imininingwane eyimfihlo ocingweni. Uma uthola ucingo olucela imininingwane eyimfihlo ungalinge uyisho kungcono ulunqamule.
Uma uthola isms ekunika i-OTP kwiselula yakho ungayicelanga bika ebhange lakho.
Uma kunqamuka i-internet esikhaleni, kufanele uqinisekise ukuthi ayenziwanga isim swap kwiselula yakho. Ukuzivikela kwi-sim swap
Ungalokothi unike abantu imininingwane yakho uma bethi bazokwenzela i-sim swap ungacelanga.
Uma kunqamuka i-network kwiselula emuva kokuthola ucingo kwabafuna ukukwenzela i-sim swap yazisa ibhange lakho.
-Uma ushintsha inamba yakho qinisekisa ukuthi wazisa ibhange lakho ukuze libe nemininingwane yakho emisha.
Uma usebenzisa ikhompyutha ukubhanga qinisekisa ukuthi iphephile.
Uma unenkinga edinga Ezabathengi ungathumela i-email ku-boniswa.mohale@ inl.co.za