Makuphele ngeziqubulo manje kudalwe imisebenzi
MHLELI: Isikhathi sepolitiki engathi shu siphelile njengoba abantu baseKZN abayizigidi ezine bengasebenzi.
Ingqinamba izwe nesifundazwe okubhekene nayo wukuntuleka kwemisebenzi. Imbangela yalokhu wukungabi nobuholi kwezepolitiki, wukuqhoqhobalwa kombuso ngobhongwane, ukukhwabanisa emabhizinisini kahulumeni nokuntenga komnotho.
KwaZulu-Natal sinabantu abangaphezu kwezigidi ezimbili abangasebenzi, abaningi sebelilahlile ithemba lokuthi bayoke basebenze. Njengoba ukuswela imisebenzi kudlange kakhulu kubantu abamnyama nabesifazane, inkulumo mpikiswano yakamuva ngemali okumele ikhokhelwe abasenzi iwukuchitha isikhathi. Abantu besifazane nentsha abasebenzi ndawo, baphila ngesondlo sikahulumeni.
Izibalo zentsha engaqashiwe eKZN zingaphezu kwezikazwelonke okungu 55%. Lokhu kusho ukuthi ilinganiselwa ku-1.183 wezigidi aintsha iminyaka yabo ephakathi kuka18 no 24 engasebenzi. Uma seyihlanginiswa nasebephelelwe yithemba lokuqasheka kuhlangana u-70%. Lokhu kwenzeka nje uMnyango wezeMpilo unezikhala zemisebenzi eziyizinkulungwane eziyisishagalombili, owezokuThuthukiswa koMphakathi ube nezikhala kodwa sibe sinosonhlalakahle abayizinkulungwane ezintathu abaqeqeshiwe kodwa abahlezi emakhaya.
Siqalaphi ukwakha amathuba omsebenzi adingekayo na? UMengameli Cyril Ramaphosa usanda kunxusa zonke izinhlaka ukuthi zibambe iqhaza ekubhekaneni nokushoda kwemisebenzi, wathi uhulumeni uvule izandla ukwamukela iziphakamiso eziqhamuka emaqenjini aphikisayo. I-DA eKZN iphonsele i-ANC inselelo ukuthi isike iphethini kuyo lapho ihola khona uhulumeni eWestern Cape. Kulesiya sifundazwe ngekota yesibili kulonyaka, imisebenzi ikhule ngo-77 000. E-KZN imisebenzi ikhule ngo-36 000.
IDA isizwe wukukhetha imigomo emihle. La eKZN uMnyango wezoThuthukiswa koMnotho, ezokuNgcebeleka nezeMvelo uqhamuke nemigomo ephucukile – lapho kudingeka ukuthi konke okuthengwa wumnyango namabhizinisi angaphansi kwawo usebenzise imikhiqizo yendawo – kodwa umbiko woMcwaningi-Mabhuku wakamuva uveze uthi ishaywe indiva le migomo. Eminye yemigomo ilahlwe le.
I-DA isiqhamuke nezindlela zokukhulisa imisebenzi eKZN, kuqala ngomasipala. Ngeshwa, ilapho inkinga ilele khona nokugxambukela kwezepolitiki nokubambezela imisebenzi eminingi okuqondwe ukukhulisa umnotho emazingeni aphasi.
Uma sifuna ukushintsha lokho i-ANC kulesi sifundazwe kumele iqinisekise ukuthi imigomo emihle yokusebenza iyalandelwa futhi iyahlonishwa. Ikomidi bekumele livakashele inhlangano eyasungulelwa ukuthuthukisa umphakathi. Uma lifika kuleya ndawo yize selathulelwa umbiko ngayo kodwa lafica kungekho lutho. Bekungekho ezokulima, kuwumhlaba ozihlalele nje.
Akusungulwe imithetho yezabasebenzi engenalo unswinyo ukuze osomabhizinisi abancane bezokhula bakwazi nokubhekana nobunzima bokuqala ibhizinisi.
Akungachithwa imali kahulumeni.
Ukudala amathuba omsebenzi akusiwo umdlalo, lo hulumeni akumele ukuthathe kancane ukuvikela amabhizinisi nabasebenzi. Isikhathi seziqubulo ezingathi shu sesiphelile. Yisikhathi sokwenza okufanele. Ann McDonnell ILUNGU LESISHAYAMTHETHO. UNGUMKHULUMELI WE-DA KWEZOKUTHUTHUKISWA KOMNOTHO KWAZULU-NATAL
Ubuhle bale nto ngibubone kithi kwaMzulwini eMgababa lapho kwakukhulunywa khona ngezinto eziningi ezakhayo, ukubumbana kwesibongo, ukuthi nina ninodwa niyisibongo nazane, niphinde nazane nokuthi nizalana kanjani, ukwazisana ningabantu bandawonye, ukuhlonipha ezinye izibongo nokunye okuningi.
Ngicabanga ukuthi uma izibongo zonke zenza njengoba benza abantu bakwaMzulwini singabona kuba nokuhloniphana ezweni, kuba khona ukwazisana nokuthandana okungazala ukuphila kahle ezweni lakithi. Mhlawumbe kungaphela nokubambana inkunzi sigebengane sisodwa siyisizwe. Cebo Mzulwini EMFUME