Abathandwa baqokelwe kumaSava
IZILOMO zomculo wokholo, Abathandwa, ziyingxenye yamaciko aqokwe kumaSouth African Volunteers Awards (Sava) abeseMethodist Church, eShowe, ngoMgqibelo.
Leli qembu eselizakhele udumo ngenoni elithi Ehhe Moya Wami nangokushaya imidanso eshisa izikhotha njengeGwaragwara neThuso Phara, liqokwe kumunxa weBest Gospel Artists nezinkakha zalo mculo okungoBabo Ngcobo,Thobekile noNathie Mthembu.
Nakuba le ngoma ike yagxekwa ngapha nangapha ezinkundleni zokuxhumana kodwa kukhona ebachazile njengomethuli wezinhlelo zezingxoxo, uFelicia Mabuza-Suttle.
Emunxeni woMbhaqanga kuqhathwe uMashwabana, oSwenka, Amabhungu, Abakhwenyana neKhehla Eliphethe. KoweBest Maskandi Newcomer kuboshelwe uMpamehlangene, Muntuyenziwa, Mlethokwakhe, Khuzimpi, Fundakwezakhe, Mkhulekelwa Mpungose, Sgabiso, Mfana WasoLundi, Okhethabahle, Shebeleza, Amaqhawe, Ozungeziwe noMcuphiwe Sibiya. KwiBest Maskandi Artist kutholene phezulu uMbuzeni, Jaiva Zimnike noBahubhe.
KwiBest Male (Gospel) Artist kunoHlonti, Velenkosini, Nhlaka M, Bongani Gazu noMncedisi Mthembu kanti koweBest Male (Maskandi) kukhona uMkhoshosho, Sanda Magubane, Thulubuke, Navigator noShilizi.
Kumaciko abenandisa kubalwa iMalini, Babo Ngcobo, Abafana BakaDladla, Boneni noLindani Gumede. Ezicukuthwaneni bekunomholi weDA KwaZuluNatal uZwakele Mncwango, Vala Mthembu weBhoklolo Entertainment nomlingisi woZalo uDK.
Umsunguli walo mqhudelwano wezindondo uDkt Bhekisisa Ngcobo uthe inhloso ukukhuthaza abantu baseNingizimu Afrika abasebenza ngaphandle kokubheka inzuzo.