Akayingabazi eka-$100bn osethimbeni likaRamaphosa
UNKSZ Phumzile Langeni osethimbeni likaMengameli Cyril Ramaphosa lokuheha abatshalizimali uthe akangabazi nakancane ukuthi bazowuqoqa u$100 billion ingakapheli iminyaka emihlanu.
Uthe kuyimanje sebethole u$35 billion okusele wukuthi kucaciswe ukuthi le mali izosebenza kanjani uma isikhona.
“Yize u$35 billion kuyimali esiyithenjiswe wohulumeni bakwamanye amazwe kodwa siyazi ukuthi izofika ngoba kukhona nosomabhizinisi bakula mazwe abafuna ukutshala imali eNingizimu Afrika. Ngiyazi sizowuqoqa u$100 billion ngoba siyithimba elizibophezele ekufukuleni umnotho waseNingizimu Afrika,” kusho uNksz Langeni.
Uthe uma beya emazweni angaphandle bekhuluma nabatshalizimali bavamise ukuthola imibuzo ngodaba lokubuyiswa komhlaba ngaphandle kwesinxephezelo, ukushintsha kwemithetho kahulumeni, inkohlakalo izoqedwa kanjani nokuthi ubudlelwane phakathi kwabasebenzi nabaqashi bunjani?
“Cishe wonke amazwe esesiye kuwona besichaza ngodaba lokubuyiswa komhlaba futhi siyazi amaphaphu aphansi manje ngoba abatshalizimali bayakuqonda ukuthi akekho umuntu ozophucwa umhlaba kodwa kuzolandelwa umthetho futhi kuxoxiswane nazo zonke izinhlaka ezithintekayo,” kusho uNksz Langeni.
Uthe abadingi abatshalizimali bangaphandle kwazise u50% ka$100 billion kufanele uphume kosomabhizinisi bakuleli.
“Uma sikhuluma ngabatshalizimali asikhulumi ngosomabhizinisi bakwamanye amazwe kuphela kodwa sikhuluma ngawo wonke usomabhizinisi onenhloso yokusimamisa umnotho nokwenza inzuzo. Siyadinga ukuthi osomabhizinisi bethu batshale imali emnothweni wezwe ukuze kudaleke amathuba omsebenzi,” kusho uNksz Langeni.
Umnotho uthe uzokhula uma abantu besebenza, benamakhono adingekayo futhi bonke bezimisele ukubeka izwe kwelinye izinga. Ubekhuluma emcimbini wamathuba omnotho azodla uR200 billion KwaZulu-Natal adale amatoho awu-800 000 namathuba omsebenzi awu-415 000.