ISharks nethuba lokuphindisa izinduku
AYANDA amathuba okuthi iSharks ithole ithuba lokuphindisele kwiWestern Province engompetha abavikela isicoco seCurrie Cup.
ISharks ingase ithole ithuba lokuphindisela kwiProvince ngemuva kwemiphumela yangempelasonto kulo mqhudelwano osuya ngasemaphethelweni.
OShaka bashaye iTafel Lager Griquas ngo 41-11 eKimberly, kwathi iProvince yathela othulini iBlue Bulls ngo 34-7 eLoftus Versveld.
Emdlalweni weSharks, uLwazi Mvovo uvalele phakathi ama-try amabili, noLeolin Zas naye washaya amabili kuleli qembu elizinze eThekwini. Esewonke ama-try ashaywe iSharks abe yisithupha.
Le miphumela isho ukuthi iProvince okuyiyona igcine iqhwakele kwi-log yeCurrie Cup izodlala neBulls ngoMgqibelo eNewlands Stadium, kuthi iSharks idlale ekhaya eKings Park njengoba yona izobhekana neGolden Lions. Le midlalo yomibili ngeyandulela owamanqamu.
Uma iSharks neProvince benqoba, bazotholana phezulu kowamanqamu eKapa ngo-Okthoba 27.
NgoLwesihlanu iLions izibekisele indawo kowamandulela owamanqamu ishaya i-iCollege Pumas ngo 33-21, eMbombela Stadium.
Phakathi kwezinto ezihlalukile kule sizini emidlalweni yamaqoqo ukuthi iProvince ayikaze ishaywe. Ngesizini edlule iSharks iphoxeke ekugcineni ishaywa iProvince kowamanqamu eThekwini, eKings Park.
Kulowo mdlalo iProvince yanqoba ngo 33-21. Lesi isilonda sisabhibha kwiSharks nabadlali bayo ubabona ngisho ebusweni uma ukhuluma ngeProvince ukuthi bafisa ukuphindisela.
UMvovo usanda kutshela leli phephandaba ukuthi nakuba eseke wasinqoba amahlandla ambalwa isicoco seCurrie Cup kodwa kungamjabulisa ukuthi aphinde asinqobe kule sizini ngenxa yokuthi mkhulu umsebenzi owenziwa kuleli qembu ekuthuthukiseni umdlalo. Uthe kuzoba iyona indlela yokubonga kubaphathi ngomsebenzi omuhle abawenzayo kwiSharks.
Umdlalo weSharks neLions uzoqala ngo-2.30 ntambama, kuthi oweProvince neBulls uqale ngo-5 ntambama.