‘Angikafiki ezingeni likaDoctor Khumalo’
ISIKHWISHIKHWISHI seMamelodi Sundowns, uThemba “Mshishi” Zwane, sijabula sibuye nganeno uma sizwa abantu besifanisa nenkakha uDoctor “16V” Khumalo.
UZwane usezakhele igama kunobhutshuzwayo eNingizimu Afrika ngokugingqa amadoda kalula enkundleni okufaniswa ncamashi nalokho okwakwenziwa wuKhumalo ngezinsuku zakhe.
UKhumalo uthathwa njengengwenya kunobhutshuzwayo kuleli ngenxa yezimanga ayezenza esagijimela iKaizer Chiefs neBafana Bafana. Akulula ukukhohlwa yibhola elihle likaKhumalo elalidle ngomjiko oya phambili, ubuhlakani nokuphasa kahle ibhola alibeke ezinyaweni zomgadli azihlulekele yena. Ungambuza namanje uPhilemon “Chippa” Masinga, Mark Williams nabanye ababedlala noKhumalo bayokutshela okufanayo. UZwane, weSundowns, ubonakala elandela ezinyathelweni zikaKhumalo ngenxa yokuthi naye wenza ayekwenza. NgoMgqibelo amaBrazilians abedlala noSuthu emdlalweni wesihle wePrince Mangosuthu Legacy Cup Ondini.
ISundowns inqobe ngo 2-1. Amagoli Abafana Ba Style avalelwe phakathi nguLyle Lakay noZwane, eloSuthu lashaywa uSiyabonga “Bhele” Nomvethe kuyiphenathi.
Kuyinto elula kuZwane, efana nokulala ungagezile, ukudlula endodeni. Nasepalini akenqeni ukuya okufakazelwa wukuvalela kwakhe amagoli kwiSundowns naseqenjini lesizwe iBafana.
“Kuyangijabulisa ukufaniswa noDoctor kodwa ngokwami angikafiki kulelo zinga. Kusafanele ngisebenze kanzima ukuze ngikhula, hleze ngelinye ilanga ngizofika kulelo zinga,” usho kanje uZwane.
UZwane ubekade engukaputeni weSundowns ngesikhathi idlala noSuthu Ondini ngempelasonto. Uke wahlushwa wukulimala okumenze wasala kwiBafana eshukana neSeychelles emidlalweni yokuhlungela i-Africa Cup of Nations (Afcon).
“Kungiphazamisile ukulimala ngoba ngisalile kwiBafana. Kodwa sengibuyile manje ngizizwa ngiwumqemane,” usho kanje uZwane.
Nakuba isidlale imidlalo ewu-20 iSundowns ingashaywa kwi-Absa Premiership kodwa ukudlala ngokulingana emidlalweni yayo kuyenza idonse kanzima kwi-log.
“Kuyiqiniso ukuthi asiyiqalanga kahle isizini kodwa sesikujwayele ngoba siyazi ukuthi siphinde sibuye, okufakazelwa wukunqoba kwethu izicoco,” kusho uZwane.