Uhlaba isibhaxu somlomo nolaka oweChiefs
UKHUZA umkhuba wokubhokela ngolaka abafana abancane umqeqeshi weKaizer Chiefs, u-Arthur “10111” Zwane oshwetshwe yithuba lokunombela kwi-log yeMultichoice Diski Challenge emuva kokubambana kwezakhe ngo 2-2 neFree State Stars eSugar Ray Xulu Stadium, eClermont, izolo.
UZwane ubekhuluma kanjena nje, yingoba iChiefs ibibukeka sengathi izowaqoqa egcwele amaphuzu kulo mdlalo kwaze kwaba ukuthi isitobha sakhe, uThabo Mokoena, senza iphutha kade kungu 2-1 kuhamba phambili iChiefs.
Lapha uMokoena ubethi uphasela unozinti wakhe, uSanele Tshabalala kodwa ibhola lazihambela kancane wafika kulona esehalazela uSiyanda Masango, walibhajisa ezintanjeni.
Ngesikhathi kwenzeka lokhu uZwane ubebonakala ukuthi ubhodla umlilo kodwa ngemuva komdlalo uqhamuke esemamatheka esekhulumela phansi ewukhuza lo mkhuba.
“Abaqeqeshi abaningi bayababulala abadlali ngokubaxebula ngesibhaxu somlomo.
Yebo, sikhona isikhathi nesidingo salokho kodwa akufanele kube yinto yemihla ngemihla.
Kusemqoka kakhulu ukuthi sikhumbule njalo ukuthi iDiski Challenge uphawini wokukhulisa abadlali,” usho kanje lo mqeqeshi osazimisele ngokusidla lesi sicoco njengoba ephethe eseDiski Shield.
Mayelana nomdlalo uZwane uzwakalise ukwaneliseka ngakho konke. Ushayele ihlombe noDuncan Lechesa ngokubophela iqembu athe beliqine satshe.
Kwenzeka lonke lokhu nje, iCape Town City iqhwakele, kwathi amamqembu aseKZN ahluleka ukusebenzisa ukuthi abesekhaya kule mpelasonto.
AmaZulu akhale ngaphansi kuyona iCity esiqhwakele. Lokhu kubeka ezika-Ayanda Dlamini endaweni yesibili bese kuba iFree State endaweni yeshumi. Amagoli eCity ashaywe uJaqueel de Jager noKeanu Cupido, kwathi elokubika ekhaya loSuthu labekwa phakathi uSandile Khumalo.
IPirates iqhubekile nokuthwala kanzima ithelwa othulini yiBaroka FC ngegoli elishaywe uJerome Dickens.
Ngemuva kwemidlalo emithathu iPirates ayiyazi iwini njengoba ibalwa namaqembu asemsileni wale ligi.
Ngaphambi kokuthi kuthathane iChiefs neFree State, iLamontville Golden Arrows nayo engaqalile kahle ibambane neHighlands Park.
Lapha i-Arrows ikwenze konke kodwa lenqaba ukungena igoli kubhoke abadlali abafana noSanele Mathenjwa, Siphamandla Sabelo noDlozi Ndaba ongene neminyakazo ebishiya izindimbane zabantu abezihambele le midlalo zijabule. Eminye imiphumela ihambe kanje:
Polokwane City 2-0 Mamelodi Sundowns; SuperSport United 2-0 Black Leopards; Bloemfontein Celtic 2-1 Chippa United; Bidvest Wits 0-0 Maritzburg United.