‘Ngifuna ukuqhubeka nomculo’
“UMA ngingenza iphutha lokuthi ngiyeke ukuqhubeka nomculo manje, ngeke eminyakeni ezayo ngifinyelele la ngifuna ukuba khona”.
Lawa ngamazwi ashiwo uXae Zamagambu Memela (19) okuthe ngeSonto waphuma ohlelweni lomculo ama-Idols SA.
UXae uthe lesi yisikhathi sokuthi abhale umculo awuqophe ukuze azenzele igama eNingizimu Afrika.
Ukuphuma kwakhe kuthuse abaningi ezinkundleni zokuxhumana ngenxa yokuthi ubengomunye wabebenza kahle.
Kodwa amavoti yiwona akhulumile, yena wagcina ethole amancane kuleli sonto.
“Ngesikhathi sisesiteji sobabili noYanga besilokhu sikhuluma sodwa sithi osalayo simfisela konke okuhle ohlelweni ngoba besingazi ukuthi ngempela ngubani ozodliwa yizembe,” kusho uXae.
Uthe usebatshelile abazali bakhe ukuthi ufuna ukuqhubeka emculweni yize engenele umncintiswano efunda.
“Ngeke ngiqambe amanga, umculo yiyona into esekhanda lami manje, nabazali bami bazongixolela ngempela kodwa ngibatshelile ukuthi njengoba sengiphumile umculo yiyona into engifuna ukuyenza okwamanje hhayi okunye. Abaculi bohlobo loShekinah bayisibonelo kimi, ngifuna ukwenza njengabo nami ngisebenze kanzima yize ngingawinile kodwa ngizakhele igama,” kusho uXae.
Uthe uzozimisa okwamanje izifundo zeHospitality abekade ezenza.
Kuma-Idols sekusele abayisithupha. Kuleli sonto, kuphinde kuphume oyedwa.
Abasele ngeSonto bazocula izingoma azaculwa ababezokwenza inhlolokhono babheda nabagcina befakwe esigabeni esaziwa ngeWooden Mic.