Kushiswe abebesolwa ngokweba u-gear box
IFUNA ubulungiswa imindeni yabalisa ababili baseLuganda, eMariannhill, okuthiwa babhunyelwe ngophethroli bashiswa wumakhelwane obebasola ngokweba u-gear box.
Ngemuva kwalesi sehlo kushone uMnuz Mxolisi Mkhize (31) oshonele esibhedlela ngoLwesihlanu ntambama emuva kokuthi yena noMnuz Moses “Sele” Magama (34) osesimeni esibucayi esibhedlela, beshiswe bangqongqa, okusolwa umakhelwane wabo ngalokhu okuthiwa bebemsebenzela.
Kuthiwa uMkhize noMagama bebevame ukusiza umakhelwane onezimoto ezidonsa ezinye izimoto uma zifile bamuwashele izimoto bese benza noma yimiphi imisebenzi abebacela ukuthi bamenzele yona.
Umthombo osondelene nodaba uthe abashisiwe bafike ekuseni ngoLwesine oludlule bezosebenza becelwe wumakhelwane bafike babuzwa ukuthi bayazi yini ngo-gear box onyamalele.
“Ube esebathatha wabayisa e-scrap yard wafike wabuza ukuthi abakaze yini bafike bezodayisa u-gear box. Abantu balapho bathe abazange bafike. Ubuye nabo wabangenisa ngaphansi kwe-carport, wababopha izandla wase ebashaya ngomphini wepiki waqhubeka wababuza ukuthi ukuphi u-gear box. Kuthe uma beqhubeka bethi abawazi wavele wabathela ngophethroli wase ebalayitha ngomentshisi kwagqamuka ilangabi,” kusho umthombo.
Kuthiwa lesi sigameko senzeke ngo-10 ekuseni ngoLwesine. Unina kaMkhize, uNkk Busisiwe Mkhize (53), uthe namanje usashaqekile emuva kwesigameko sokubulawa kwendodana yakhe.
Uthe uthole umbiko ngoLwesine emini uthi indodana yakhe nomunye umfana sebeshaywe bashiswa. UNkk Mkhize uthe uphuthume waya kamsolwa wazama ukumbuza ukuthi uyishonisephi indodana yakhe noMagama kodwa wavele wavala isicabha wangamtshela.
“Sithole ukuthi umsolwa ubathathile wayobashiya esibhedlela eRK Khan nokuthi uthe uma ebashiya wathi bebebhema iwunga basha nomjondolo. Kubuhlungu kakhulu kithina ngoba kungcono ukuba ubebabizele amaphoyisa uma ebasola ngokweba kunokuthi abashise bese ephinde eyobashiya esibhedlela aqambe amanga. Lezi zingane zishe kabuhlungu kusuka ekhanda kuya emzimbeni wonke akubonakali lutho. Lona owami ushonile, lona omunye akasakwazi nokukhuluma,” kusho uNkk Mkhize.
Uthe bafisa sengathi kungenziwa ubulungiswa aboshwe osolwa kulesi sigameko.
Ilungu lomndeni kaMagama, elicele ukuthi igama lalo ligodlwe, lithe kungcono ukube bekukhulunywa indaba yokuthi umsolwa ubashayile.
“Kubuhlungu akwenzile kubona. Kumanje uSele usesibhedlela. Sigcina ukumbona ubesesimeni esibi kakhulu,” kusho ilungu lomndeni.
Imindeni yabagilwa ikhala ngokuthi umuntu osolwa ngalesi sehlo akakaboshwa usabonakala ehamba emgwaqweni.
Okhulumela amaphoyisa KwaZuluNatal, uCaptain Nqobile Gwala, ukuqinisekisile ukuthi amaphoyisa aphenya icala lokubulala nelokuzama ukubulala emuva kokushiswa kwababili.