Sihlehlile isicelo sebheyili kwelokufa kukaMchunu
ISICELO sebheyile samadoda ayisithupha, okubalwa kuwo nekhansela le-ANC, siphinde sahlehla eNkantolo eNkulu yaseMgungundlovu.
Amadoda abekwe icala lokubulala isishoshovu se-ANC, eMoses Mabhida, uMnuz Msawenkosi “Maqatha’’ Mchunu.
Isicelo sebheyili sesizolalelwa izinsuku ezine kusukela ngo-Okthoba 23-26.
Izolo bekulindeleke ukuthi silalelwe isicelo sebheyili kodwa kwavunyelwana ngokuthi sihlehliswe ukuze kunikwe imantshi entsha, uMnuz Sello Maboee, isikhathi esanele sokuzijwayeza imininingwane yecala.
UMaboee uthathe icala ngemuva kokuhoxa kwemantshi ebikhona, uMnuz Ashin Singh, ngemuva kokuthie esolwe ngokuchema nabameli babamangalelwa.
USingh kuthiwa wabonakala ekhuluma nabameli babasolwa ephaseji kodwa yena uthi alikho icala analo ngoba yinto ejwayelekile ukuthi izimantshi zikhulume nabameli.
Izolo kuvele ukuthi uMbuso uhlela ukubeka icala lokubulala enye indoda nokufa kukaMchunu.
Indoda ibilokhu ivela enkantolo namanye amadoda kodwa yona iboshelwe elinye icala lokukhipha budedengu isibhamu emphakathini.
Lokhu kuthiwa kwenzeka ngaphambi kokuthi kubulawe uMchunu.
Ummeli wendoda, uMnuz Benny Mohamed, utshele inkantolo ukuthi omqashile usebekwe icala lokubulala.
UMohamed ucele ukuthi acaciselwe ngokuthi kwenzekani ngendoda yesikhombisa ukuze isicelo sayo sebheyili sizolalelwa kanye nalezo zamanye amadoda ayisithupha.
Umshushisi, uNkk Rene Padayachee, uthe indoda okukhulunywa ngayo okwamanje kayikabekwa icala lokubulala uMchunu kodwa kusalindwe isinqumo sePhini loMqondisi wezokuShushisa KwaZulu-Natal, uMnuz Thulani Selepe, elizonquma ukuthi iyabekwa licala noma cha. Amadoda ayisithupha sekuphele inyanga eboshiwe kodwa akakabuzwa ukuthi ayalivuma noma ayaliphika yini icala. Bekugcwele phama enkantolo, ngaphakathi kukhona amalungu enhlangano abefuna ukuzwa ukuthi kwenzekani ngecala.
Ngaphandle isasasa belehlile, kukhona isigejana samalungu eqembu singaculi abanye bemi izixongololo, abanye bezihlalele ngaphansi kwezihlahla emakethe.