Bakhala ngesigwebo esincane abashonelwa yizingane
IKHALA ngesigwebo seminyaka engu-10 imindeni yabafundi abashona engozini yetekisi nebhasi eNtuzuma.
Izolo iNkantolo yaseNtuzuma igwebe umshayeli wetekisi uMondli Mazwi Zisongo (30) ngecala lokubulala ngokungenhloso abafundi abahlanu.
Uyisemkhulu kaNtobeko (16), uMnuz Themba Ngidi, uthe okubuhlungu ngukuthi umshayeli uzosheshe aphume ejele ekubeni ithemba lakhe walingcwaba.
“Ngiyakhala kakhulu ngalesi sigwebo ngoba kule minyaka engu-10 emihlanu ilengisiwe. Uzophuma khona manje ejele, eyami ingane engangithemba ukuthi iyona ezongingcwaba ilele kobandayo. Unina wayo le ngane ubengafuni nokuza enkantolo ngoba engafuni ukumbona lo mshayeli owasiphuca ingane yethu ngokuba budedengu,” kusho uNgidi.
Uyise kaSibusiso Sibiya, uMnuz Bongani Mposa, wayeka umsebenzi ngenxa yale ngozi eyamhlukumeza.
“Ngaphazamiseka kakhulu emqondweni ngakhetha ukuyeka umsebenzi wami ngoba ngehluleka ukwamukela ukuthi ngishonelwe ngenye ingane. Ingane yami bekungukuphela kwayo kulandela ukushona komunye umfana wami ngo-2003. Unina washona bebancane ngazikhulisela bona, kwabe sekushona owokugcina. Lesi sigwebo sincane, bengifuna noma iminyaka engu-20 esejele umshayeli,” kusho uMposa.
Uthe okwamhlukumeza kakhulu ukuhamba ubusuku bonke ngelanga lengozi ebheka ingane yakhe engazi ukuthi isishonile.
Uthe noma eseyitholile base beyibanga nomunye umndeni uzitshela ukuthi ingane yawo ngenxa yendlela eyayilimele ngayo ingasabonakali.
Eminye imindeni okufundwe izincwadi ezifungelwe ngokuhlukumezeka kwayo ithe impilo ngeke iphinde ifane.
Unina omncane kaNdumiso, uNksz Nonhlanhla Majozi, uthe udadewabo washona engozini enenyanga, uNdumiso wazikhulisela yena njengengane yakhe.
“Okwangihlukumeza kakhulu wukuhlala e-ICU elimele kakhulu nodokotela besho ukuthi konke okungaphakathi akusasebenzi. Waba sezinhlungwini ezinzima ngilokhu nginethemba lokuthi uzosinda,” kusho uNksz Majozi.