Kuteleka abasembonini kaplastiki

KUME nse ukusebenza embonini kaplastiki emuva kokuthi abasebenzi abawu-10 000 belaxaze amathuluzi befuna ukunyuselwa amaholo ngo-15%.

UNkk Phakamile Hlubi-Majola obhekelele ezokuxhumana kwiNumsa kuzwelonke uthe namhlanje kuzoba nemashi ePinetown, ozosuka eduze kwenxanxathela yezitolo iPinecrest ebiyaziwa ngeSanlam Centre, iye esiteshini samaphoyisa asePinetown lapho abaqashi bezothatha uhlu lwezikhalo.

UNkk Hlubi-Majola uthe abasebenzi bafuna ukubuyiselwa imihlomulo akade beyithola ngesikhathi bengaphansi kwe-bargaining council efanayo neyabasebenza ngokusansimbi. Ubalule ukuthi umhlomulo ophansi embonini yabasebenza ngokusansimbi wuR40 ngehora kodwa kwekaplastiki uwuR20 ngehora futhi abawatholi amabhonasi.

“Ungenzanjani uma umqashi wakho ekutshela ukuthi uzohhafula umholo wakho? Yile nto eyenzekayo embonini kaplastiki yingakho beteleka. INumsa ifuna abasebenzi bathole imihlomulo yabo neholo elifanele. Bafuna u-15% nokuthi ihora libe wuR40 hhayi uR20,” kusho uNkk Hlubi-Majola.

Uthe ziwu-450 izinkampani ezizothikamezwa ngenxa yalesi siteleka kodwa baphoqelekile ukuthi bateleke ngoba abasebenzi bayaxhashazwa. Ezinye izikhalo zabasebenzi wukunyuswa kwamahora okusebenza asuke ku-40 aye ku-45 ngesonto.

Ukwehliswa kwezinsuku zekhefu zisuka emavikini amane kuya kwamathathu bese kuba wukuthi abasebenza ezindaweni zasemakhaya umholo wabo wehliswe ngo-10% kulowo otholwa wozakwabo abasezindaweni zasemadolobheni.

INational Employers Association of South Africa ithe izophawula namuhla ngemuva kwemashi.