Badinwe wukungafezwa kwezithembiso
KUPHAZAMISEKE umphakathi kwezinye izingxenye eMnambithi kumasipala i-Alfred Nzo ngenxa yombhikisho abantu bekhala ngokuhluleka kwemeya wukufeza izithembiso zentuthuko.
Kusuka ngoLwesihlanu imibhikisho iqale phansi elokishini iSteadville naseColenso nalapho imiphakathi esezindaweni eziqhelelene ikhala ngokushaywa indiva ezinhlelweni zokwakhelwa izindlu ezakhahlanyezwa yimvula eyayinesiphepho ngo-2012.
Abanye bakhala ngokuthi izinhlelo zentuthuko, okubalwa nokutholakala kwemisebenzi, zikhetha iphela emasini.
IMeya, uVincent Madlala, kuthiwa iphume ngesamagundane eSteadville, umphakathi usho ukuyiqeda ufuna ichaze ukuthi yini ebambezele ukuba izindlu zawo zingalungiswa ekubeni sekuphele iminyaka zacekelwa phansi yisiphepho.
Ngisho izolo abebeya emsebenzini bathwale kanzima ngoba imigwaqo yaseSteadville ibivalwe ngamatshe kusukela ngoLwesihlanu.
UMnuz Thando Nyandeni (24), oyilungu lomphakathi, uthe bapheshukelwa yizindlu ngo-2012 kodwa umasipala wabathembisa ukuthi uzobalungisela.
“IMeya uMadlala yazisholo yona ukuthi ngenxa yesimo semali bazozama ukuthi njalo onyakeni wezimali omusha balungise imizi engu-60 kuze kuphothulwe lonke uhlelo. Emuva kwalokho yanyamalala yabuya isithi babanjezelwe yisifundazwe ngabe sebeqedile ukwakha izindlu njengoba sekuphele iminyaka eyisikhombisa. Sifile yimvula sinethwa ngempelasonto ngoba izindlu zingenwa yimvula,” kusho uNyandeni.
Uthe okwenze baxosha uMadlala wukuthi ubakhohlisile waletha abantu ababaziyo abasebenza ehhovisi lakhe wathi basuka kuhulumeni wesifundazwe abethi bazochaza ukuthi kungani kunokubambezeleka kohlelo lokulungiswa kwezindlu.
EColenso umphakathi usabhikishela ukuboshwa kwamalungu ayeyingxenye yombhikisho wentuthuko ngoJulayi.
Lo mphakathi izolo umashele eNkantolo yeMantshi yaseMnambithi ufuna badedelwe ngoba ukholwa wukuthi abantu okwakumele baboshwe ngamaphoyisa abawasola ngokuthi abadubula kwaze kwashona elinye ilungu lomphakathi.
IMeya uMadlala ithintiwe yanqaba ukuphawula yathi icela kuthintwe ophethe ezokuxhumana kumasipala, uMnuz Sya Maphalala, ukuze aphendule.
“Ngicela uthinte uMaphalala osiphathele ezokuxhumana ukuze kube nguye ophendulayo kule mibuzo yakho,” kusho uMadlala.
UMaphalala ethintwa uthe ucela ukuthunyelelwa imibuzo nge-email kodwa ugcine engayiphendulanga.
Uphinde washayelwa ucingo ukuze aphendule kodwa ucingo lwakhe ubengasalubambi kwaze kwashaya isikhathi sokushicilela.