Basalwela amanzi aphuma kompompi
USAMISE yonke into umphakathi waseNgonyameni othi ufuna amanzi.
Izolo bekuvalwe umgwaqo omkhulu oqhamuka eMlaza oya eMbumbulu odlula kule ndawo ngamathayi avuthayo, amatshe, izihlahla, kumbiwe nemigodi emgwaqweni.
Ababhikishi abaku-ward 100, ababhikisha izikhawu, bathi bakhathele wukuthutha amanzi ngamabhala noma ngamakhanda ekubeni benompompi abangaphumi amanzi emagcekeni.
Selokhu uqalile umbhikisho sekushiswe inkantolo yesizwe nehholo lomphakathi, abafundi abayi esikoleni uma kunemibhikisho.
Izolo bekunomhlangano olandela owangeSonto ongaphumanga nesisombululo. Ngaphambi kokuthi kuqale lowo mhlangano umphakathi uvukele emgwaqweni wawuvala.
Abagcinanga lapho ngoba kuthiwa bababophe ngozankosi onogada benkampani eqashelwe ukulungisa amapayipi amanzi okuthiwa onakele.
Elinye ilungu lomphakathi ebelisebantwini abebebhikisha, elingathandanga ukuthi lidalulwe ngoba lithi lesaba ukuboshwa ngamaphoyisa abopha abangobhongoza bombhikisho, lithe ngeke bayeke ukubhikisha amanzi engakaphumi kompompi.
“Sekuphele isikhathi eside sisho ukuthi asiwafuni amanzi alethwa yimoto ngoba aphela endleleni, abanye abantu bangawatholi, asiwafuni afakwa emathangeni ngoba abanye abantu bayawangcolisa ngokufaka izinto ezingcolile kuwona. Sifuna aphume kompompi esinabo emakhaya. Sesikhathele ukulokhu sithenjiswa kuthiwa udaba lwethu luyalungiswa. Yevile eshumini iminyaka sidingida udaba lwamanzi. Uma singatshelwa usuku okuzophuma ngalo amanzi ngeke uphinde usibone emgwaqweni, siyobuyela uma isithembiso singafezwa. Emihlanganweni esesibe nayo nomasipala abasiniki usuku,” kusho obebhikisha.
UMnuz Mandla Nsele, oyinhloko yezokuxhumana esabambile kuMasipala weTheku, uthe abasebenzi bophiko lwamanzi nokuhanjiswa kwendle baxoshwa amalungu omphakathi bethi bazobheka ukuthi yini edala izinkinga ezenza ukuthi amanzi angaphumi kube kusetshenziswa ubuchwepheshe.
“Abasebenzi bethu manje kuzomele baye emphakathini ngoba kunenkinga yokuthi asiwaboni amanzi engena edamini eliphakela umphakathi wakule ndawo. Sicela umphakathi wakule ndawo ubekezele, senza konke okusemandleni ukulungisa lolu daba,” kusho uNsele.
Ikhansela lendawo, uMnuz Mbuyiseni Mkhize, lithe bayazama ukuxazulula udaba lwamanzi kodwa kunzima ngoba umphakathi awuzimisele ukubambisana nabo.
“Sizoba nomhlangano wokudingida zona izinkinga zamanzi namhlanje (izolo) kodwa sebeqala ngemashi, babopha onogada ngozankosi. Abanye abasebenzi bakamasipala baxoshwa yiwo lo mphakathi. Manje ugcina ungasaqondi ukuthi uma kuxoshwa abantu abazolungisa inkinga yamanzi kanti azolunga kanjani. Kubukeka sengathi sekunobugebengu. Angikholwa wukuthi abazali bangavimbela izingane zabo ukuthi ziye ezikoleni,” kusho uMkhize.
Okhulumela amaphoyisa kulesi sifundazwe, uCapt Nqobile Gwala, uthe kuboshwe owesilisa oneminyaka ewu-27 ngecala lokudala udlame emphakathini.
Oboshiwe uthe ubesequlwini ebelivale umgwaqo ngamathayi avuthayo limba imigodi emgwaqweni.