Kuyancomeka okwenziwe wuLady D ehlomisa ngoqedisizungu
NGESONTO eledlule, umsakazi woKhozi FM, uDudu “Lady D” Khoza ubenomcimbi wakhe awusungule ngonyaka odlule owaziwa nge-Dinner with Dudu.
Ingqikithi yomcimbi walo nyaka ibigxile emkhakheni wezikaqedisizungu njengoba bekukhona izikhulumi ezinjengoLinda Bukhosini, Baby Cele noMinnie Dlamini.
Lezi zikhulumi ziqeqebulile ngokuhle nokumbi ngomkhakha wobumnandi ezisebenza kuwona zicobelelana ngolwazi ezinalo.
Bonke basho ngazwi linye begcizelela ukubaluleka kokufunda, ukuzihlonipha nokuhlonipha umsebenzi owenzayo kanjalo nokuphatha imali kahle ikakhulukazi uma isuke isangena ngoba sibuye sicwebe isiziba.
UBaby ongumlingisi uvulele izihambeli isifuba ngokuthi amaphutha awenza ehluleka ukuphatha kahle imali njengoba aqala ukuduma engumlingisi kwiSarafina aholela ekutheni adlelwe umuzi nemoto.
Uthe akafisi ukuthi abanye abantu abakule ndima badlule kulokhu yena adlula kukho.
ULinda ongumculi we-opera futhi oyisikhulu esiphezulu sesikhungo sobuciko, iThe Playhouse, ugcizelele ukuthi abantu abafisa ukungena kulo mkhakha abafunde bangathembeli kwithalente labo lodwa ngoba ithalente lilodwa alanele.
NoMinnie uhambe kulawo mazwi esho ukuthi kumqoka ukuba nesicucu umuntu angasisebenzisa uma izinto zingahambi ngendlela afisa ngayo.
Umkhakha kaqedisizungu ngomunye wemikhakha ethandwayo ikakhulukazi yintsha ngoba ibona ubukhazikhazi obuhambisana nawo okuhlangene nodumo.
Yingakho nje sikushayela ihlombe lokhu okwenziwe nguLady D ukuthi asebenzise lo mcimbi wakhe ukulethela intsha nabazali bayo osaziwayo abakhiphe izeluleko ezakhayo ukuze labo abafisa ukungena kulo mkhakha bezothi bengena bebe sebehlome ngolwazi oluzobasiza.
Izigcawu ezifana nalezi ziyadingeka kakhulu ngoba zizolekelela ukunciphisa ukuthi abantu abasebenza kuwona bashone behlwempu ngoba bengakwazanga ukuphatha kahle imali.
Kuhle lokhu okwenzile Lady D, uqhubeke njalo.