Uphiwe amathoyizi onembobo enhliziyweni
UFISA ijabule njengabo bonke ontanga bayo indodana yakhe umzali wengane eyazalwa inembobo enhliziyweni othobeke amanxeba inikelelwa ngamathoyizi.
UNksz Nqobile Msomi waseMandeni uthe kumzwisa ubuhlungu ukubona indodana yakhe uZamokuhle (6) ibhekene nezinselelo ngenxa yokugula kwayo. UZamokuhle wazalwa enesifo esibizwa ngeCongenital Heart Defect (CHD), okwenze waba nenkinga yokuhamba kusukela esemncane. Lo mfanyana uthobeke inhliziyo enikelelwa ngendathane yamathoyizi aseToys R Us ngempelasonto eThekwini, okuyiphupho elifezwe ngabenhlangano iReach for a Dream. Echaza ngesimo sendodana yakhe uthe ngesikhathi sekumele ahambe uZamokuhle waba nenkinga yokungasebenzi kahle kwesingezansi.
“Ngaqala ukunaka ukuthi unenkinga emilenzeni ngesikhathi ehluleka ukuhamba njengezinye izingane. Kwadingeka asebenzise izinduku esekhulile ngoba kunzima ukuzihambela. Kube yisimo esinzima kakhulu ngoba ubengakwazi nokudlala nontanga yakhe, ngisho umfowabo oneminyaka emine. Akakwazi ukudlala emnyango agijime njengezinye izingane,” kusho uNksz Msomi.
Uthe indodana yakhe ikukhonzile ukudlala kumphatha kabi ukuyibona ingakwazi ukukhululeka.
“Ngifuna ukumbona ehleka ejabulile njengezinye izingane. Ngijabulile ukumbona ethola amathoyizi ngoba kube ukuphumelela kwephupho lakhe wazizwa eyingane ejwayelekile,” kusho uNksz Msomi.
UZamokuhle usalokhu elashwa ngodokotela ngenxa yalesi sifo esikhinyabeza isingezansi. NgoJuni nonyaka ubeyohlinzwa inhliziyo kanti uzophindela esibhedlela ngoMashi. Welashwa esibhedlela eNkosi Albert Luthuli lapho ebonana khona nodokotela wenhliziyo nowemilenze zinyanga zonke. Kumanje akakazwi ukuzihambela kodwa usizwa yizinduku ngenxa yokuba buthaka kwemilenze. UNkk Nicole Jansen Van Vuuren, oyiMarketing Manager kwaToys R Us & Babies R Us South Africa, uthe bakujabulele ukufeza iphupho likaZamokuhle. Ubonge iReach for a Drem ngokweseka umkhankaso wokubuyisa ithemba ezinganeni ezintekenteke.
“Lezi zingane ziphila kanzima usuku nosuku. Sithemba ukuthi sizoqhubeka nokulekelela ekujabuliseni izingane naseminyakeni ezayo,” kusho uNksz Kerry Donkin oyiMenenja yale nhlangano esifundazweni.
Umkhankaso wale nhlangano owokusiza izingane ezizalwe nezimo ezixakile izijabulise ngamathoyizi minyaka yonke.