Ungase uphinde unyuke uphethroli
UNGASE unyuke futhi uphethroli ekupheleni kuka-Okthoba njengoba intengo ka-oyela ongahluziwe ilokhu iphezulu.
Isitatimende esithunyelwe yi-Automobile Association (AA) izolo sithe, u-oyela ubiziswa wukuthi kunokuxokozela eSaudi Arabia, izwe elikhiqiza u-oyela omningi emhlabeni jikelele.
“Siyajabula ukuthi irandi liyadlondlobala futhi nohulumeni kukhona akwenzayo ukuqinisekisa ukuthi uphethroli awunyuki kakhulu,” kusho i-AA.
Ithe ucwaningo lwayo luveza ukuthi uphethroli ungase unyuke ngo-40 cents ilitha ekupheleni kuka-Okthoba uma kuwukuthi isimo siyaqhubeka nokuxokozela eSaudi Arabia.
Udizili uzonyuka ngo-70 cents bese upharafini unyuke ngo-65 cents ilitha.
I-AA ithe akuqinisekisiwe ukuthi uzonyuka uphethroli ngoba bakhipha le ntengo ngenxa yesimo esikhona ezimakethe zamazwe akhiqiza u-oyela njengamanje.
“Siyajabula ukuthi uhulumeni unemizamo yokuqinisekisa ukuthi uphethroli awunyuki njengoba ufuna imibono yezinhlaka ezehlukene embonini kaphethroli. Lokhu kuzosiza abathengi nomnotho wezwe ngoba ukunyuka kukaphethroli kuvimba ukukhula komnotho,” kusho i-AA.
Icele uhulumeni ukuthi eze nemithetho ezogqugquzela abatshalizimali ukuthi bafake imali yabo emnothweni waseNingizimu Afrika ukuze irandi lizosimama no-oyela uthengwe ngemali encane.
Isazi somnotho se-Efficient Group, uMnuz Dawie Roodt, sithe okwamanje asiwuboni wehla uphethroli. Siyacela abantu baqhubeke nokubopha izifociya ngoba uyabiza kumanje uphethroli.