Uqola abantu esebenzisa igama leqembu
ISIKHULU seHighlands Park sixwayisa abazali nabadlali ngendoda eqola abantu ngokubathembisa ama-trial isebenzisa igama leqembu.
Kuthiwa indoda, eyinkunzi yomkhwabanisi, ibhale ekhasini layo lika-Facebook ukuthi iHighlands Park izoba nama-trial ngo-Okthoba 21 e-Esselen Park, eKaalfontein kusuka ngo-9 ekuseni kuya ku-4 ntambama.
Kuthiwa ifuna ukufakelwa uR2 500 umdlali ngamunye iphinde icele ukuthunyelelwa umazisi womdlali ukuze imbhalise. Ibuye ithembise nendawo yokulala kulabo abaphuma ngaphandle kwaseGauteng.
Umxhumanisi weHighlands Park, uSibonelo Ngidi, uthe indoda eyenza lokhu kusolakala ukuthi idabuka eNigeria. Igama ezibiza ngalo ithi inguNaicker.
“Sixwayisa abadlali nabazali ukuthi bangalinge bayinikeze imali. Inombolo ayishiyile ku-Facebook ithi 074 278 6131. Ningalinge niyifonele. Iqembu alikhokhisi nhlobo nxa lenza ama-trial futhi alikaze libe namatrial kulo nyaka. Ngisho kungathiwa liyawenza, alisoze lacela umuntu ukuba akhiphe isimemezelo kodwa liyozenzela lona,” kusho uNgidi onezezele ngokuthi udaba bazoludlulisela kwabomthetho.
Isitatimende esikhishwe yiHighlands Park, sithi indoda ibesebenzisa neqophasikhungo (logo) seqembu ezincwadini ebizikhipha, okungaqondakali ukuthi ibikwenza kanjani lokho.
“Sisizwe ngumuntu othile obone le nto ku-Facebook, ngaphandle kwalokho ngabe asikayazi. Naye lo ositshelile ubebuza ngoba ubesathathekile. Siyacela impela abantu bangalinge bethembe lezi zinswelaboya,” kuphetha uNgidi.
IHighlands izobhekana neMaritzburg United emdlalweni weTelkom Knockout Last 16 eHarry Gwala Stadium, eMgungundlovu ngoMgqibelo ngo-8.15 ebusuku. Uma sekubuyela imidlalo ye-Absa Premiership inomdlalo onzima lapho izodudulana khona neBidvest Wits eBidvest Stadium ngo-Okthoba 26. Imidlalo elandelayo ye-Absa Premiership:
Okthoba 24: Free State Stars v Lamontville Golden Arrows (Goble Park Stadium, 7.30pm)
Okthoba 26: Bidvest Wits v Highlands Park (Bidvest Stadium, 8pm)
Okthoba 27: Orlando Pirates v Kaizer Chiefs (FNB Stadium, 3.30pm); Polokwane City v Maritzburg United (New Peter Mokaba Stadium, 3.30pm); Cape Town City v AmaZulu FC (Cape Town Stadium, 8.15pm); Chippa United v Mamelodi Sundowns (Sisa Dukashe Stadium, 8.15pm)
Okthoba 28: Black Leoapards v Free States Stars (New Peter Mokaba Stadium, 3.30pm); SuperSport United v Lamontville Golden Arrows (Lucas Moripe Stadium, 3.30pm); Bloemfontein Celtic v Baroka FC (Dr Molemela Stadium, 3.30pm)